في البداية احب اوضح نقطة ..
اللي فاكر نفسه هيستفيد حاجه من النوت دي غلطان
و اللي فاكر اني عندي فكرة او رأي عاوز اوصله للقارئ برضه غلطان !
انا كاتب النوت دي عشان معنديش جديد اقوله
و معنديش قديم برضه ..
هي م الاخر مجرد نوت لتضيع الوقت و لقتل شوية فراغ عندي بدل ما اقوم اتفرج علي توفيق عكاشه !
و اهه اعمل الحاجه قليلة الاهمية احسن ما اعمل الحاجه عديمة الاهمية و الفائده و النفع و النتيجه و عديمة كل حاجه !
ف من الاول كده عشان اخلي مسئوليتي ..روحوا اعملوا الحاجه الاقل اهميه من قراءة النوت الغير مهمه لأن اكيد هتبقي الحاجه دي اهم ..و ده نقدر نستنبطه مما سبق و ذكرته فوق ع اليمين ..ما علينا لو مستمرين في القراءة ..براحتكوا بقي
اول ايام السنه الجديدة (اللي هي 2012 زي ما انتوا عارفين) عدي عليا و انا في شغلي و محستش اصلا انها ابتدت ..يمكن ده السبب اني كل ما اكتب 2012 اغلط و اكتب ف الاول 2011 فبل ما ارجع اصلحها .. مش متعود بقي ,المهم ..
فتحت الفيس بوك لقيت كله متفائل بالسنه الجديدة و حاسس انها هتبقي سنه حلوة و هابي نيو يير و كل اللطايف و الظرايف و الحاجات (الكيوت )اللي بتتقال كل سنه دي !
افكركم ان 2011 الغير مأسوف عليها قبل ما تبتدي و من ليلة 31 ديسمبر 2010 كان كله بيقول كده لحد ما بدأت البشاير ف اول ساعات ف اول يوم ف السنه المشئومة دي بأحداث كنيسة القديسين .. و مش مضطر افكركم بباقي المصايب اللي كانت فيها علي كل الدنيا مش علي مصر بس.. ما علينا
اليوم ابتدا بالنسبالي بعد ما خلصت شغل و روحت بيتنا و قلت احلق دقني قبل ما انام عشان مضيعش وقت ف حلاقتها قبل ما انزل تاني الشغل تاني يوم ..
علي اساس انها سنه جديده و عاوزين نبدأها علي نضافة.
لما ركزت شوية ف المرايا لقيت نفسي اخدت بالي من شعري الابيض .. انا عارف انه موجود من زمان مكنتش متفاجئ, بس الفكره اني مكنتش مركز بس قبل كده !
ده غير اني عارف انه هيبيض بدري بدري عشان ابويا الموقر شعره شايب اصلا من و هو ف ثانوي ..
مع انه كان دايماً يقوللي و انا صغير ان ماما هي اللي خلت شعره شاب بعد الجواز , مما استدعي ماما انها تكبر صورة خطوبتهم و تعلقهاله ف الصاله عشان ميفتحش بقه ف الموضوع ده بعد كده - و هو ده اللي حصل- عشان كله كان بالادله و البراهين ولا مرتضي منصور ..
و بصراحه لعبتها صح .
نرجع للنقطه المهمة اني كنت مهيأ نفسياً لفكرة ان شعري يشيب بدري و كان عندي رد واحد علي اي حد يجيب سيرة الموضوع ده و هو (ان ده بيديني هيبه و وقار و انه غيران مني عشان معندوش شعر شايب يديله هيبه و وقار) ..طبعاً ده كان منتهي استخفاف الدم مني بس هو ده الرد المؤدب اللي كان متوفر بدل ما اقوله و انت مال (مامتك) مثلاً , او اني اسيبه و امشي مردش عليه (في اقل رد فعل مني في الفظاظه و الجليطه و قلة الذوق) و علي ايه الطيب احسن .. خفة دم بخفة دم بقي و البادي اظلم !
النقطة الاهم بقي اني لما قررت اغسل شعري لقيت شعري بيقع ..انشفه الاقيه بيقع ..اسرحه الاقيه بيقع ..قلت لأ ما بدهاش بقي
يعني شعري شاب و استهبلت و قلت ده لزوم الوقار
انما صلع ! طب اللي يسألني بعد كده اقوله ده دليل الذكاء مثلاً ؟دليل النبوغ و العبقرية ؟؟
ما كل العباقره كانوا بشعر نيوتن كان بشعر و اينشتاين كان بشعر و زويل بشعر .. كلهم كانوا بشعر يعني ماليش حجه ! يجيلي واحد خفيف الظل منعدم الكينونه يقولي بسماجه شديدة علي سبيل انه بيهرج ( يا عم ما داروين كان اقرع)و قبل ما اقوله و انت مال (مامتك) همسك نفسي و اجاوب بمنتهي الحكمه انه و هو قدي كان بشعر ..
النقطه الاهم من المهمة ان محدش حاسس احساسي
شاب
جامعي
يعمل في وظيفة نقدر نقول عليها محترمة
اينعم هي شركة نص مصر بتكرهها عشان النص ده حظه العاثر خلاه من العملاء بتوعها و النص التاني بيكرهها و مش هيبقي من العملاء بتوعها و هي شركة موبينيل (لزوم الدعاية ) او الشركه المصرية لخدمات التليفون المحمول (لزوم الفزلكة و تضيع وقت القراء ) و شبكة المحمول الاولي في مصر (لزوم الاسترسال ف الكلام الفاضي و تضيع وقت القراء اللي انا اصلا مش عارف هما ليه مازالوا مستمرين في قراية المقال التافه ده ) و بالمناسبة الشركة دي مش بتاعة نجيب ساويرس خـــالص ( لزوم عدم اللزوم)
اكمل بقي باقي الصفات
شاعر
مثقف
رومانسي
لطيف
علي خلق
يتحب كده لله ف لله من اول ما تشوفه
و حاجات كتير اوي مش بحب اذكرها لأني مبحبش اتكلم عن نفسي لأني متواضع ..
بل لأني اعظم المتواضعين علي الاطلاق !
كل الصفات الهايلة دي بالاضافة الي :
اصلع ,
الشوية اللي فاضلين ف شعرة نصهم شايب,
بكرش !
و هي دي المصيبه
شاب اصلع و شعرة شايب و بكرش ..
و طبعاً مش محتاج اقول انه اعزب
و اعتقد دي نتيجة منطقية للاستهلال اللي فات .
بدأت احس اني ضعت و انتهيت
و علي وشك الدخول في حالة اكتئاب
خصوصا ان بتجيلي نوبات زهايمر كده مبفتكرش حاجه خالص
يعني كل اعراض الشيخوخة المبكرة !
(انا مش عارف انتوا ليه مازلتوا مستمرين بالقراءة .. هتستفيدوا ايه مش عارف )
و مش عارف بقي اقعد اندب علي حظي ولا اتذكر الايام الخوالي اللي كنت فيها حليوة و شيك و سمباتيك و فانتاستيك و كل الحاجات اللي اخرها إيــك زي مارلون براندو و هو صغير ..
منتوا اكيد فاكرين اكتر مني انا كنت عامل ازاي زمان ..
خليني ف دلوقتي ..
لازم ابص لقدام ..
مش هبكي ع الاطلال ..
ولا هضيع وقت ف الندم ع اللي فات ..
ولا ناوي اني..
اني ..
هو انا كنت بتكلم ف ايه اصلاً !!!
استنوا كده اراجع اللي كتبته افتكر كنا بنقول ايه
.
.
.
اه صح افتكرت..
كنت عاوز اهنيكم بالسنه الجديده ..
كل سنه و انتم طيبين
و هابي نيو يير
و يا رب تبقي سنه حلوة يا جميل
و كل سنه و انتم طيبين
ليست هناك تعليقات:
إرسال تعليق