ازاي تعرف انك دلدول لواحده معينه و مدلوق عليها !
1- طلباتها مش بتخلص : تملي تلاقيها محتاجه منك حاجه , توصيله , خدمة , رصيد للموبايل , سلفه .. حتي لو هي مستواها المادي كويس هتلاقيها بتطلب منك حاجات سهل جداً تطلبها من اخوها او ابوها لكن مع ذلك بتطلبها منك يا دغف ! ليه ؟ لأنك دغف يا دغف و بتستمع و هي راكباك و بتستغلك و انت مسلملها رقبتك طوعاً و طواعية .
2- هتلاقي تملي انك انت اللي بتتصل بيها , انت الل بتسأل عليها , إلا ف حالات انها تكون محتاجه منك حاجه ( راجع النقطة الاولي).
عمرها ما قالتلك معلش معايا مكالمه (waiting) , هقفل و اكلمك تاني , و رجعت كلمتك !
و عموماً مكالماتكم و مش بتتعدي دقايق معدوده , في حين ان ممكن لو بتكلم بتاع الدليفري مكالمتك معاه تاخد وقت اطول .
لو ركزت كده هتلاقي حتي في الشات ما بينكم معظم ردورها من نوعية : " lol , ok , haha , :) ", و ما الي ذلك .. لو ركزت اكتر هتلاقي ان انت اللي دايماً بتبدأ الشات اصلاً .
3- عمرها ما بتخرج معاك لوحدكم , تملي معاها حد من اصحابكم , او حتي حد من صاحباتها بتفرجها علي المغفل اللي هيا بتشتغله ولا اجدعها مفرش تريكو .. ممكن كمان تخليك تعزمها هي و صاحباتها علي السينما او الاكل او تطلع منك بأي مصلحة .
4- ملكوش اي صور مع بعض .. غالباً لو في صور ليك معاها هتبقي ف وسط مجموعه كبيره , انت واقف في ركن لوحدك في الصورة و هي في السنتر و حواليها باقي الناس
5- هتبقي متسجل علي موبايلها بإسمك الثنائي او الثلاثي احياناً , او ممكن متسجل بإسمك بتاع الفيسبوك .. و طبعاً مش هيكونلك (caller photo) علي موبايلها من الاساس ... طبعاً انت هتبقي مسجلها علي الموبايل (my baby) و حاططلها احلي صورة ليها خلفية اساساً .
6- لو ركزت شوية هتلاقي ان ملكوش اي اهتمامات مشتركه , و ملكوش اي ذكري سعيده مع بعض.
7- لما بتقدمك لصحباتها هتلاقيها بتقول : فلان الفلاني زميلي في الجامعه , او علان العلاني بيشتغل معايا , او ترتان الترتاني اخو فلان ..
في حين انك لما بتقدمها لحد من صاحباتها بتقول له : اقدملك شيري اللي كلمتك عنها ! و تلاقي صاحبك بيرد ردود من نوعية : ياااااه هي دي بقي , اخيراً شفتك , ده الجحش ده ياما كلمني عنك , مالوش سيره غيرك قارفنا بيكي ليل نهار !
8- في جمل هتلاقيها بتقولهالك كتير زي : انا مش مستعده للارتباط , انت زي اخويا , مبفكرش في الجواز دلوقتي .. ده لو هي بنت ناس و مش بتستغلك .
في حالة انها بتلعب بيك كورة شراب بقي هتلاقيها بتتلذذ انها تقوللك حاجات تضايقك , زي مثلا الواد فلان ده مز اوي , بحب الولاد الطويله اللي جسمها حلو ( و انت اصلاً اوزعه و فشله ) , تسألك عن رأيك ف صور ليها مع ولاد تانيين و ممكن كمان تطلب منك تصورها مع ولاد تانيين لو انتوا في خروجه مثلاً ! و انت طبعاً هتصورها ,, ليه ؟ لأنك بقف.
9- هتلاقي نفسل متعرفش حاجه عن عيليتها . اسرارها , احلامها , طموحاتها , افكارها .. كبيرك اوي تعرف اسم اصحابها اولاد اللي بتكلمك عنهم !
و هي بدورها عمرها ما هتسألك علي تفاصيل ف حياتك , او تتكلم معاك في المستقبل .. غالباً كل ما تيجي تكلمها ف حاجه مهمه هتلاقيها بتقاطعك و تدخل في موضوع تاني .
لو ف وسط مكالمة و جت لحظة صمت هتلاقيها عماله تطول و تطــول و تطـــــول و هي مش هتبذل اي مجهود انها تنهي الصمت ده!
10- لو الصدفة جمعتكم مع بعض في مكان لوحدكم هتلاقي الوضع كالتالي بالزبط :
مفيش ( eye contact ) من اي نوع ,الابتسامات الصفرا مفيش اكتر منها , بتتكلم في الموبايل كتير , واتساب شغال مبيقفش.
معظم كلامكم عبارة عن : ايه الاخبار ؟ و ازي الصحه . و ايه الجديد . و عامله ايه ؟ و انت عامل ايه ؟ ..
و الردود من نوعية : الحمد لله , كله تمام , ماشي الحال , و انت ازيك !
و ما الي ذلك من كلام يحسسك انك ممل اكتر من عماد الدين اديب شخصياً !
11- عمرها ما هتقولك تعالي نخرج , او عاوزه اشوفك , و عمرك ما هتحس انك واحشها او ف بالها اصلاً .
و لما بتشوفك عمرها ما هتلاقيها بتمدحك , او تلمسك بقصد , و تملي هتلاقيها مش مهتمه بشكلك و مش بتعلقلك عليه , او ممكن تقولك تعليقات من نوعية وزنك زاد اوي , قميصك مش مكوي , البنطلون ده شكله بيئة اوي .. و ما الي ذلك من جمل تعل و تشل و تحرق الدم ... مش هيبقي في مجاملات الا لو ناوية تطلب منك حاجه .
12- صعب جداً تلاقيها بتقفش عليك لأسباب تهمك لأنك متهمهاش اصلاً , مثلا عمرها ما هتقفش عليك عشان كنت بتكلم بنت تانيه او لأنها بتغير عليك..
ممكن تقفش عليك لو كانت طالبه منك خدمة و انت عملتهالها بطريقه مختلفه عن الطريقه اللي حضرتها اديتلك أمر عسكري تعملها بيها !
13- صعب اوي نكتك و افيهاتك تضحكها !
14- عمرها عمرها عمرها ما هتخرج معاك في الفالانتاين .
بقلم بنجراوي نوفل رطاط لملوم القفل
