مراية الحب عامية .. ده شئ معروف من زمان ,
عشان كده بتلاقي نفسك مستمر في علاقات محكوم عيها بالفشل الذريع عاجلاً او اجلاً و انت مش واخد بالك ..
خليني اساعدك و اقولك شوية نقط ممكن تنفعك في حالتك المدهولة دي و تخليك تشوف الحقيقة المره :
1- لو بتحس تملي انك محتاج تبذل مجهود مضاعف عشان تجذب اهتمام اللي بتحبه , محتاج تسأل عليه تملي لأنه مش هيسأل عليك , او محتاج تقوله اخبارك لأنه مش هيحاول يعرفها .
2- بتقابلوا بعض كتير ؟ طب لما بتتقابلوا بيبقي لوحدكم ولا معاكم ناس تانيه ؟
اصلا حبيبك او حبيبتك بيسعي انه يقابلك ؟؟
لو اجاباتك علي التلات اسئلة دول كانت "لأ" احب اقولك ان مجرد استمرارك في العاقة دي فيه اهانه ليك .. انهيها بمزاجك من دلوقتي بدل ما تنتهي غصب عنك في المستقبل .
3- لو اسعدك حظك و قعدت مع حبيبك علي انفراد مره .. ايه اخبار الـeye contact ؟ ايه اخبار التلامس العفوي باليد مثلاً في وسط الكلام او الهزار ؟
لو قليل او مفيش يبقي فكر تاني .. مفيش كيميا بينكم . او كان في و خلص و محدش بعت يجيب .
4- التفاصيل .. التفاصيل من اهم الحاجات اللي بتبينلك اهتمام اللي قدامك بيك من عدمه . مثال بسيط , هتلاقي نفسك بتثني علي شياكة حبيبك , لو جمال البرفيوم اللي حاطه لما قابلك , او روعة تسريحة شعرة حتي لو مش مغيرها ..
انما لو لقيت الطرف التاني مش بيعلق علي اي حاجه فيك انت قاصد تعملهاله مخصوص لأنك في العادي مبتبقاش كده يبقي في حاجه غلط , مش منطقي انك تبقي لابس له اللي ع الحبل و عامل شعرك و حالق دقنك .. و عامل البدع عشان يبقي شكلك امور لما تقابله و تلاقيه مخدش باله ..
عارف ليه مخدش باله ؟
انا عارف انك ابتديت تخمن !
طبعاً لو تملي بينتقدك ده موضوع تاني مش هتكلم فيه , عشان اكيد انت دلوقتي اتأكدت هو بيعمل كده ليه ..
5- ايه نوعية المواضيع اللي بتتكلموا فيها سوا ؟ هل بتمحور حوالين انك تسأله عملت ايه النهارده او احكيلي تفاصيل يوم ؟
مع العلم انه مش هيسألك نفس السؤال , او هيسأله علي سبيل انه يملي فراغ في المحادثه مش اكتر ..
لو مفيش بينكم كلام عن المستقبل يبقي العلاقه ملهاش مستقبل , خليك واثق من كده .
لو كل الكلام بينكم سطحي و عام يبقي العلاقة دي مش عميقة كفايه لدرجة تخليك متمسك بإنك تحاول تكملها .
6- ممكن يسألك علي نفس الموضوع كذا مره مع انك اتكلمت فيه معاك قبل كده ؟
ممكن ؟!! عارف ليه ؟
لأنه مش بيسمعك باهتمام اساساً و الكلام بيدخل من الودن دي يطلع من الودن دي ..
لما بيسألك بيبقي مجرد اسئلة روتينة معتاده , زي ما انت تسأل حد قبلته صدفه مثلا "ازيك" او "ايه الاخبار" .. و انت مش فارق معاك تعرف الاجابه و رد فعلك في كل الحالات هيبقي واحد .
7- هتلاقي تملي انه بيغير المواضيع و يتهرب من اجابة اسئلة معينة تهمك ..
ليه بقي ؟ لأنه مش عاوز يدخلك في حياته و مش عاوزك تعرف اسراره .
نصيحة لوجه الله .. لم اللي باقي من كرامتك , و اخلع !
8- تملي لما بتتخانقوا بيبقي حبيبك شايف العيب فيك و الغلط عندك , و انك انت سبب المشكله , مع ان اي خناقه بين اتنين بيبقي ممكن يكون فيها اسباب كتير زي ان طرف هو اللي غلطان او ان حد موقع بينهم او تان في سوء تفاهم حصل مثلاً ..
لكن لأ , في خناقاتكم لازم هتطلع غلطان حتي لو انت ملاك طاهر نقي برئ .
9- طبعاً طالما اتخانقتوا و هو شايفك غلطان - او بيتلكك و بيقول انك غلطان - هتلاقي نفسك انت المسئول تملي عن ان الميه ترجع لمجاريها مره تانيه و تتصالحوا .. انت اللي هتتحايل و انت اللي هتدادي و انت اللي هتتأسف حتي لو مش غلطان ..
عارف ليه ؟ عشان انت اللي بتحب !
10- ساعات بتحس انه مش فاهمك ؟ و مش بيحاول يفهمك ؟
طب ساعات انت بتحس انك مبقتش فاهمه مهما حاولت تفهمه و مفيش حاجه تعملها بتعجبه؟
في الحالتين في مشكلة كبيرة و مش هتتحل غير بإنهاء العلاقة .
11- معظم كلامكم بقي شات واتساب او فيسبوك ؟
طب الكبيره بقي .. بيبقي اونلاين و مش بيكلمك حتي ؟
اجابتك "ايوة" ؟
بجد ؟
طب ممكن انا اسألك سؤال .. انت معندكش دم ؟
12- ساعات بيبقي حبيبك مكمل معاك مش عشان بيحبك , انما عشان هو حابب فكرة الارتباط نفسها , محتاج حد معاه ..
لو شكيت في الموضوع ده مجرد شك يبقي انت بتجني علي نفسك لو كملت العلاقة دي بالشك اللي جواك.
13- بيشبع احتياجاتك العاطفيه ؟
سواء "ايوة" او "لأ" .. خلي اجابتك لنفسك , بس انت عارف الاجابة النموذجية اللي تخليك تستمر .
14- لو تملي جواك سؤال " يا تري بيحبني زي ما بحبه " .. اعرف ع السكة و ع الدوغري وع الطوالي كده انه مش بيحبك .
اعمل في نفسك جِميلة و اكسب فيك ثواب ,
دور علي حد يحبك بجد , و يقدرك بجد , و يحترمك بجد,
بدل ما انت ممرمط نفسك مع حد مش عمره ما هيحبك ..
دور علي اللي يستاهلك و يحس ان وجودك في حياته في حد ذاته نعمه ربنا باعتهاله ..
عشان غير كده تبقي العملية بيعه بالرخيص و خسرانه كمان .
و لو بتحبه اوي و مش قادر تبعد عنه ,رجعه في الفريند زون يا سيدي لحد ما تلاقي غيره ..
بس خليك عارف ان العمر اقصر بكتير من انك تضيعه بتجري ورا الاشخاص الغلط .
بقلم بنجراوي نوفل رطاط لملوم القفل
ما اعرف شلون اشكرك نصيحتك صححت من اللي بداخلي شكرا جزيلا .. اخوك من العراق
ردحذف