لماذا ارفض هؤلاء .. دليل الناخب الذكى .

انتخابات الرياسة قربت ,

و انا عارف ان كتير منكم محتار يرشح مين  من وسط كل اللي اكتشفوا فجأة انهم قد المريسة..
عشان كده انا حبيت اساعدكم و اقدملكم : 

دليل الناخب الذكى

تعلم كيف تختار رئيسك في 24 ساعة .. بدون معلم

و بما اني من النوع اللي دايماً بيشوف نص الكباية الفاضي ف معظم الاحيان ,

و مش بيشوف النص المليان إلا في احيان قليلة و شحيحة بل و نادرة .. 

فأنا جاي النهاردة ارفض ( هؤلاء)

و هقول اسباب رفضي و اطلع فيهم القطط الفاطسة

 بالادله و البراهين و الاثباتات و المستندات و السيديهات و الديفيديهات و الفلاشات

و الميكروتشيبات كمان - إن وُجدت - اللي ماتخرش المية,

و هوضح وجهة نظري

بحيادية و موضوعية و منطقية و فلسفية و جهنمية و كل الحاجات اللي اخرها (إيّه)

و هقدم فاصل من النقد البناء طبعاً ..

و هقدم رؤية سياسية اجتماعية تحليلية شاملة و بحتة..
و هراعي ذمتي و هرضي ضميري ف كل حرف بكتبه..
و انتو عارفين كويس ضميري و ذمتي بقي ..

مبدأياً انا حابب ابتدي الموضوع بالجنس اللطيف عشان نطري القعدة شوية علي رأي كابتن ممدوح فرج ..

يلللللللللا بيننننا 

.
.
.

لماذا ارفض ترشيح بثينه كامل لرئاسة مصر 

اولاً لأنها ست* و مصر ولّادة و حبلي و بكرية ( علي رأي الشيخ إمام ) ,
ولسه فيها رجاله حلوة بشنبات (علي رأي الست رولا سعد ) ممكن يحكموها,
ده غير ان ابو تريكه قال انه يرفض ان تحكم مصر ست و انتوا مش متخيلين انا بحب ابو تريكة قد ايه ..
ده الماجيكو يا اخواننا مش عاوزين نزعله برضه .

ثانياً طبعاً كلنا فاكرين برنامج اعترافات ليلية اللي كانت بتعمله ف التلفيزيون زمان ..
تخيلوا بقي قبل الثورة كانت بتعمل برامج ( تدغدغ احاسيس الشباب و الشابات) زي ما بيقولوا امال بعد الثورة هتعمل ايه ..

استغر الله العظيم , لا لا لا  كله الا كده . شعب مصر متدين بطبيعته و لا يمكن يقبل كده ابداً ابدا ً.

و كمان دي مش لابسه حجاب يعني مش هتطبق شرع ربنا ..
يعني ممكن البلد تضيع ( قال يعني هي لسه هتضيع ) ف الرجلين بسببها..
اعوذ بالله لا لا لا بلاش الست دي..

و بعدين الست لسة متجوزة جديد و مش طبيعي يعني انها هتهمل مصالح بيتها و جوزها علشان تراعي مصالح المواطنين , 

ده حتي يبقي تضارب مصالح ..
اصل افرضوا انها بقت حامل بقي .. هتاخد اجازة امومة م الرياسة ازاي ؟؟
و الاهم بقي الاجازة دي هتبقي بمرتب ولا بدون مرتب .. دي اموال دولة مش هزار !

*انا سمعت ان سُمية الخشاب ممكن ترشح نفسها, في الحالة دي انا مؤيد مؤيد مؤيد بشده و لأخر مدي مؤيد,
و بدعم دور المرأة في المجتمع و حقها ف المريسة .. دي حتي سُمية كويسه... اه و ربنا كويسه ..
و كويسة اوي كمان !

حتي اسألوا الريس عمر حرب .. ماهو ريس برضه!

هيقولكم ان مصر في امس الحاجه للكفاءات..
و سُمية بصراحة .. كفاءة !

-------------

لماذا ارفض ترشيح أيمن نور  لرئاسة مصر 

ايمن نور بالذات لأ ..
هقولكم ليه من غير ما تسألوني 

الراجل رد سجون يا اخواننا

بقي معقول يبقي رئيس جمهوريتي رد سجون !!

هو انا ادخل رئيس طره اجيب مكانه واحد كان مقيم ف طره قبله؟؟!!

لأ و تم الافراج عنه قال ايه لأسباب صحية ..
ده اكيد مبارك كان بيحبه عشان كده افرجوا عنه 

و انا مش ممكن اجيب رئيس جديد مبارك كان بيحبه.

و بعدين ايمن نور محامي

و ابوه كان محامي

و جده كان محامي

يعني محامي اباً عن جداً

توريث يعني ..
و انا معنديش استعداد ان نور ايمن نور يورث الحكم من ابوه بشعره الكنيش ده ..
ممكن لو حلق شعره افكر ف الموضوع ..
ده غير ان اتباعه ف حزب الغد خلعوه م الحزب ف اضطر انه يعمل حزب جديد
و انا بقي معديش استعداد اجيب رئيس قابل للخلع ..
البلد محتاجه استقرار..

عشان عجلة الانتاج طبعاً ( كأن العجله يعني مش بتبطل لف و المكنه طلعت قماش و محدش دريان) متتوقفش.

بالاضافة  لانه ليبرالي تحرري .. 

يعني هيقلع امي الحجاب لو كانت بتلبس حجاب

و البلد هتبقي كلها دعارة و خمور و الناس ماشية بتطوح ليل نهار علي عينك يا تاجر.

لا لا لا شعب مصر شديد التدين بطبيعتة ولا يمكن هيقبل كده ابداً ابداً.

 اهم سبب يخليني ارفض الراجل ده انه غاوي مشاكل
لبط من و هو لسه بيبتدي حياته 

ف حزب الوفد ايام فؤاد سراج الدين ..

لا لا لا الله الغني البلد مش ناقصة مشاكل

احنا عاوزين واحد 

ياخدنا بالحُنين و ميعملناش لبش و وجع دماغ.
--------------------

لماذا ارفض ترشيح محمد سليم العوا لرئاسة مصر 

مشكلة العوا ان محدش عارف  له اتجاه ولا تيار
يعني لا  اسلامي اوي ولا ليبرالي اوي
لا يساري اوي ولا يميني اوي
لا اخواني اوي ولا سلفي اوي
لا اشول اوي ولا ايمن اوي
ملوش مسكه يعني
زئبقي كده زي بركات ملك الحركات
ده غير ان تصريحاته عن إيران مثيرة للشكوك
و دفاعة عن الشيعة ف البحرين مثير للجدل
و ترافعة عن رجال اعمال من يتوع النظام السابق مثير للشبهات
غموض انتمائة الكروي مثير للحيرة
راجل كده كله اثارة ف اثارة
بطريقة مثيرة للدهشه!!
بالاضافة لأن اسمه مش عاطفي خالص
العوا !
كأنه اسم انثي العو
لا بيخوف ولا بيضحك
ولا له معني اساساً
ده غير انه محدش هيعرف ينطقة من الدول الاجنبية
Al - 3awwa
مش عارف ده هيقولوه ازاي..
نعلمهم الفرانكوا اراب بقي
ال 3 يعني ع
و ال5 يعني خ
و نجيب مصحح لغوي و وجع قلب ع الفاضي..
لا لا لا الشعب المصري شديد الاستسهال بطبيعته  و مش هيقبل كده ابداً ابداً .
احنا الريس بتاعنا لازم يبقي اسمه سهل و يتحفظ بسرعة
زي الرئيس (مُبارِك)  كده علي رأي الشريفة ماجده*..


*الشيخة الشريفة ماجده كائن حي عجيب
يرتدي النقاب و النظارة ..
و يصدر اصواتاً تشبه كلام البشر, لكنه غير مفهوم بلا منطق او معني ..
و للي ميعرفهاش انصحه نصيحة اخوية :
 يروح كده زي الشاطر يدور عليها ع اليوتيوب
بتقول حاجات تشيـّـــب
اسرار خطيرة فعلاً.

انتظروا الجزء الثاني و الثالث و يمكن الرابع عشان المرشحين فعلا كتير اوي ..

بقلم : بنجراوي نوفل رطاط  لملوم القفل