في البداية احب اوضح نقطة ..
عشان نبقي علي نور
و محدش ييجي يقوللي انت ضحكت عليا و خليتني اقرا النوت غصب عني
المقال ده نسخة طبق الاصل المقال بتاع السنه الل فاتت"1" (انظر الهامش اخر المقال).. ماشي
لا حرف زاد ولا حرف نقص
هو بس الاختلاف ف شوية التحابيش و حبة الحبشتكانات و الهجايص اللي انا بعملهم
و بضحك بيهم ع القراء السذج"2" - اللي هما حضراتكم- اللي غالباً هما هما نفس القراء السذج
اللي قرأوا مقالة لست عن 2012 اتحدث بتاعة السنه اللي فاتت
علي فكرة في المقالتين المضمون واحد
و هو انكم تخرجوا مش فاهمين حاجه بعد ما تخلصوا قراية
بعضكم هيحاول يقراها مره و اتنين عشان يبفهم
احب اقوله متضيعش وقتك مش هتفهم
حافظ علي شوية النظر اللي ربنا مديهملك
و متكملش قراية
المقال به سمٌ قاتل"3"
اللي عنده حاجه مهمة او قليلة الاهمية يقوم يعملها افيد له
لأن الل هيقراه ده غير مهم علي الاطلاق
ولو انه لو قراه كويس
ممكن يغير حياته
كلامي متناقض ؟ اكيد طبعاً
حد فاهم حاجه ؟ اكيد لأ طبعاً
و هو المطلوب
دلوقتي انا خليتكم عاوزين تكملوا المقال للأخر عشان تشوفوا ايه اللي ممكن يغير حياتكم
واحد نبيه هينزل لأخر المقال و هيفوت الجزء اللي ف النص
احب اقوله انت غلطان و هترجع غصب عنك تقراه م الاول
لأني خبيث جداً
زي التعاليب بالزبط
مكار
ولا ببيض ولا بولد .. توقع مني اي حاجه"4"
لسه مكملين قراية طبعاً انا عارف
براحتكم و بشوقكم
جنت علي نفسها براقش
طبعاً نص اللي بيقروا دلوقتي سمعوا المثل قبل كده
يبقي اتوقع ان في نص اللي بيقروا مسمعهوش
ده وضع طبيعي
اللي مش طبيعي بقي
انك تكتشف انك من التلات اربع اللي ميعرفوش اصلاً
مين براقش دي
و انا مش هقولكم
موتوا بجهلكم "5"
بمناسبة التلات اربع
فيكم ناس متفائله و بتبص لربع الكباية المليان
احب انبه و انوه و احذر و اوضح و ابين
ان في تلات اربع فاضي
خدوا بالكم من تلات اربع الكباية الفاضي
الي كل المتفائلين
و اصحاب نظرية الدنيا بخير
و اكذوبة لسه اللي جاي احلي
و بدعة اضحك للحياه تضحكلك
افيقوا من غيبوبتكم الغير مبرره
يا قوم
تــــــــــــشــــــــائمـــــــــــــــــــــــــوا
انا جايبلكم من الاخر اهه و احنا لسه ف الاول
عشان محدش يقولي انت بتخم و بتاع
اللي هيكمل معايا المقال للأخر يبقي بيكمله علي مسئوليتة الشخصية
انا ماليش دعوة بحد
محدش يروح يقول ده شربني حاجه اصفرة عشان اكمل قراية ف الكلام الفاضي ده
ما علينا
نرجع لموضوعنا
تشائموا يا اخوتي .. بل و اكتئبوا ايضاً
أليست بكآبة الوجه ينصلح القلب ؟
ده سليمان الحكيم اللي قال كده مش انا
اكتئبوا بقي !
هو الحقيقة الموضوع مش كده
انا بستخدم الايات لأغراض شريرة ف نفسي
بحاول اضحك عليكم و اضللكم باسم الدين
فاكرين لما قلتلكم المقال ممكن يغير حياتكم
اهو اللي هيقرا ممكن يدخل الجنه
و ممكن لا
انا مقلتش هيغير حياتكم للأفضل ولا للأسوأ
لسه مكملين قراية ؟
براحتكم
استمروا انا مبسوط بيكم اوي
سيبكم من موضوع الاكتئاب
بس ع الاقل تشائموا
ليه بقي ؟
اقولكم
كل الحلوين الطعمين اللطاف الظُراف - و ليس الظَراف"6" -
اللي كانوا متفائلين ب 2012 و انا حذرتهم برضه و مسمعوش كلامي
ركبوا دماغهم و مشيوا ورا كلام بابا نويل و صدقوه لما قعد يتخن صوته و يقولهم
هوو هووو هوووو .. هابي نيو يير
اتخدعوا فيه و هو عمال يهز ف كرشه كل ما يضحك
دخل عليهم بضحكته العجيبة و كلامة المعسول
و اجراسه اللي كان عمال يشخلل بيها زي العيال !
افتكروا انه عشان راكب عربية بيجرها كام غزال بيطير يبقي خلاص
بيقول الحقيقة
لا يا ساده .. انتم اتضحك عليكم
تقدروا تقولولي ايه رأيكم ف 2012؟
حطوا عنيكم ف عيني و قولولي يا اسطورة انت غلطان
طبعاً متقدروش
لأن الاسطورة مبيغلطش
تعالوا كده نفتكر 2012 حصل فيها ايه
الاخوان مسكوا المجلس
مجزرة بورسعيد
موقعة العباسية
انتخاب محمد مرسي رئيساً للجمهورية
الخروج الامن لعسكر
مقتل الجنود في رفح
براءة المتهمين في موقعة الجمل
أحداث محمد محمود 3
احداث الاتحادية
احداث القائد ابراهيم 1 و 2
كم هائل من خطابات مرسي و مبنفهمش منها حاجه
حصار مدينة الانتاج و حصار الدستورية
الدستور المنيل اللي جابوهولنا
حوادث قطارات متنوعة منها قطارين دخلوا ف بعض و قطارين كل واحد فيهم دخل ف عربية نقل ف حادثتين مختلفتين و قطار دخل ف اتوبيس مليان عيال صغيره و قطارين كل قطار فيهم فيه اخر عربيتين ولعوا بسبب الاهمال
انهيار اقتصادي
حسام غالي جاله رباط صليبي
خيري رمضان رجع سيبي سي تاني
اهم نقطه ان الشعب اتقسم نصين نص اسلامين و اخوان و النص التاني علماني و ليبرالينن و ماسونيين و نصاري و كفره
النقطه الاهم من اهم نقطة "اشاعة" 7 وجود مخطط لخطف مرسي
واحد يقولي كل ده يخلينا نتفائل بالسنه الجديده
لأن صعب اوي تيجي سنه اسوأ من كده
لا يا حلو
افتكر انك قلت كده ف اول 2012 و اخر 2011
ده غير ان خبير علم الابراج - مش عارف بقي علم ليه و امتي- استاذ محمد فرعون
بيقول ان كوكب اورانوس دخل علي برج الحمل ف 2011 و هيفضل قاعد لحد 2018
و ما ادراكم لما اورانوس يعمل كده
حقيقي ما ادراكم
محدش عنده دراية ولا حد فاهم حاجه غير سيادة الخبير
و علي فكرة بقي الراجل اول واحد قال ان هيفاء هتطلق ف 2012 و اتطلقت
و لأني برج الحمل
للأسف انا حاسس اللي اورانوس بيعمله
و مش مبسوط
ما علينا ده موضوع ممكن نبقي نتكلم فيه بعدين
المهم دلوقتي
انا الحقيقة مش عارف اشكر ازاي اللي فضلوا مكملين لأخر المقال
احب اقولكم
اني فعلاً فخور ان عندي قراء زيكم
مؤمنين بقدراتي ككاتب
و عندهم استعداد يضيعوا كل الوقت ده ف قراية الكلام التافه اللي بكتبه
انا حقيقي سعيد بيكم
و هكون سعيد اكتر لما تؤمنوا بدعوتي
و مش بس كده
انا مستنيكم تنشروا افكاري المسمومة بين اصحابكم
و اصحابكم ينشروها بين اصحابهم
و ساعتها بس العالم كله هيبقي ملكينياهاهاهاهاها.."8"
المقال خلص .. مش حابب اني اخيب ظن اللي مستنيين اني اقولهم هابي نيو يير و كده ..
و لا حابب اني اكسر قلب اللي منتظر مني اقوله كل سنه و هو طيب
عشان كده
هابي نيو يير و كده
و كل سنه و انتم طيبين
----------------------------------------------
الهامش اللي ف اخر المقال :
"1"صراحة
"2" بجاحة
"3" استظراف و ألش رخيص
"4" نكته مصرية قديمة
"5" اهو غلاسه كده
"6" الظَراف : نوع من انواع الحيوانات له رقبه طويلة .. مالوش علاقة بموضوعنا
"7" بين قوسين .. ايف يو نو وات اي مين
"8" اوفر جداً .. الضحكة دي اتلغت من الستينات
ليست هناك تعليقات:
إرسال تعليق