12 سبب لحرق كنيسة امبابة
انا مش من الناس اللي بتقصد تعمل فتنه ( لو حصل من غير قصد مفيش مشكله )
الريس مشي خلاص بعد الثورة ... و مصر بعد 25 مش زي مصر قبل 25 ... دي حاجة واضحة طبعا و الا الثورة يبقي ملهاش لازمه كدة
و مادام الثورة نجحت يبقي مصر اتغيرت .... فاكيد مفيش تعصب و لا كراهية بين الناس ... - مادام حسني مبارك مشي- ( الناس كانت بتقول في التحرير انه هو اللي عمل الفتنه ... انا مش فاهم ازاي بس هم اكيد فاهمين اكتر )
قعدت فكرت بقي قلت يا واد ...اكيد في سر ورا الي حصل دة
انا عن نفسي لقيت شويه اسباب بعيدة خالص عن التعصب و الكلام الفاضي دة
1- اختفاء التعصب بعد رحيل حسني مبارك عمل نوع من العصبية الشديدة .. احنا ازاي كنا كدة قبل كدة فكان حرق الكنيسة مجرد نوع من ال (group therapy ) مش اكثر
2- بعد انتهاء التعصب اخواتنا السلف اكتشفوا ان المسيحيين اخواتهم فعلاُ فحبوا يعملوا فينا جميله بانهم يبعتوا شهدا للسما كنوع من المشاركه الوجدانية ليس الا
3- كانوا عايزين يتاكدوا ان النظام الامني للحرايق في الكنايس كويس و يتاكدوا من سرعة رد فعل المطافي لو الكنيسة ولعت عشان يطمنوا لو حصل حاجة بعد كدة و دة بيدل علي ان المطافي هو اعدائنا الحقيقيين
4- كانوا بيحتفلوا ب التالت بتاع بن لادن فحبوا يعملولوا هدية مش اكتر
5- كانوا عايزين يشاركوا المسيحيين في الصلاة ... بس موضوع يولعوا في شمعة دي مش في ثقافتهم و حسوا انها مش كفاية اول مرة فحبوا يجاملونا فحرقوا الكنيسة كلها كنوع من الواجب
6- كانوا عايزين نار عشان تحرق اي ذكري لوجود الكفار اللي جم في امبابة ( الفور كاتس ) – راجع فيلم اسد واربع قطط – فكانوا عايزين ذبيحة يقدموها لربنا فلقوا الكنيسة مكان طاهر فحرقوه عادي يعني
7- و ممكن ارتباطاً بالسبب اللي فات كانو بيردوا علي اغنية ( امبابة امبابة امبابة جامدين اوي بس غلابه ) فحبوا يقولوا انهم مش غلابة ولا حاجة لا دول جامدين اوي ..
8- احتفالاً بذكري ميلاد دقلديانوس عشان كانوا فاكرينه قديس ... فاحتفلوا بيه معانا بطريقته
9- مش هنقول ماس كهربائي ممكن سبب اوقع ... الوحش الكهربائي طلع من كارتون مازنجر و كان بيجرب سلاحه الجديد فالسلفيين كانوا رايحين يحاربوه لحد ما مازنجر ييجي
10- كان في واحدة مخطوفه فعلاً فقالوا دي هتعمل فتنه لا عم تولع المهم الوحدة الوطنية ... بس فولعوا فيها فعلاً بهدف الوحدة الوطنية مش اكتر
11- اب كاهن مختل عقلياً ولع في الكنيسة عشان ... عشان ... عشان هو مختل عقليا ً
12- شاب مسيحي حب واحدة مسيحية فاهله حرقوا الكنيسة ( سبب برضة علي فكرة :D (
و في الاخر بقي نقول ان ف مسرحية وجهه نظر محمد صبحي لما شاف واحد متعصب قاله ( هو الاخ من امبابه ؟ ) و دة بيدل علي ان اي تعصب مش بين المسلم و المسيحي انما بس امبابة دي حادثة فردية
اكيد طبعاً دة مش اضطهاد ولا حاجة :D:D:D:D
اكيد طبعاً دة مش اضطهاد ولا حاجة :D:D:D:D
بقلم محجوب ابو عجوة
ليست هناك تعليقات:
إرسال تعليق