قراءة متأنية في تاريخ ابريق الشاي- انا انا انا ابريق الشاي؟ هل خدعنا صلاح جاهين ؟

بغض النظر عن العنوان المبالغ فيه 😁

انا عايز اخدك في رحلة قصيرة ل 30 40 سنه فاتوا كدة, و افكرك بحاجة عظيمة تعتبر من كلاسيكيات التليفزيون المصري

الحاجة دي هي اغنية انا انا انا ابريق الشاي, اللي غناها سيد الملاح و كتبها صلاح جاهين و لحنها ابراهيم رجب  

نبداً الاول بكلمات مطلع الاغنية

انا انا انا ابريق الشاي ايدي كده بوزي كده اصب الشاي وارجع كده
واعرف برضه يا كتاكيت أحكي حواديت

كلمات مطلع الاغنية متاخدة من اغنية امريكية اسمها I'm a little teapot اتذاعت اول مرة سنه 1939

و دي كلمات الاغنية الاصلية اللي تقريباً بتدي نفس المعنى

I'm a little teapot,

Short and stout,

Here is my handle

Here is my spout

When I get all steamed up,

Hear me shout,

Tip me over and pour me out!

البداية عادية, فكرة لطيفة لابريق الشاي اللي بيحكي حكايات للاطفال, تاريخ ابريق الشاي مع الاطفال كبير, مثلا زي ابريق الشاي اللي كان مع اليس في بلاد العجائب و ابريق الشاي اللي في قصة الجميلة والوحش, غير الاغنية اللي لسه قايلينها فوق (I'm a little teapot)

 المهم يعني ان ابريق الشاي لسبب مش مفهوم مريح نفسياً للاطفال و بيحبوه

هنا بقى في كلام مهم, الاغنية تقريباً اتصورت في وقت السادات, و دي حاجة مش مؤكدة (ملقتش التاريخ بتاعها في اي حته)  بس هقول ليه حالا
لاحظوا حاجة مهمة ان صلاح جاهين و سيد الملاح كانوا بيحبوا جمال عبد الناصر جداً و مكانوش بيحبوا السادات, دوروا في الموضوع يعني, بس مش دي القضية
انا اللي شفته بعد ما سمعت الاغنية و انا كبير ان الموضوع مش مجرد اغنية اطفال, دول اتنين عباقرة, كاتب و مغني بيوصلوا رساله في وسط نظام مستبد, فعملوا الرساله دي ف شكل اغنية اطفال كنوع من الاستهزاء بالنظام

 

قبل ما تاخد فكرة معينة عن المقال انا عايزك معلش تقراه كله و بعدين تقرر

نبدأ نشوف الاغنية حته حته بقى

 

المقطع الاول:

كان في واحد اتنين تلاتة ويا أربعة خمسة تاتا راحو لعم علي الحلواني عايزين بسكوت بالشكولاتة
الحلواني يا أطفال فكر حبة وبعدين قال: بسكوت بالشكولاتة مفيش يمكن في عند البقال
والبقال قال اشتروا سكر، خدوا بفلوسكم كلها سكر، احلى شئ في الدنيا السكر حتى اسألوا ابريق الشاي

اللي بيحصل في الاغنية هنا, ان الاطفال (المستهلك) رايحين لعم علي الحلواني (المتخصص في بيع السلعة المطلوبة بما انه حلواني) و بيطلبوا سلعه واضحة ومحدده ( بسكوت بالشيكولاته), بعد كدة قالهم انه معندوش, يمكن في عند البقال (البقال هنا شخصية جديدة, واضح انه مكانش بيبيع بسكوت بالشيكولاته قبل كدة عشان كدة الاطفال مراحوش من الاول)

بيتكلم هنا عن بداية ظهور البوتيكات في مصر ف ايام السادات مع الانفتاح الاقتصادي و بداية ظهور الرأسمالية,  خصوصاُ انه بعد كدة فعلا بيطبق الراسمالية زي ما بيقول الكتاب, البقال مقالش عنده بسكوت بالشيكولاته ولا لأ, البقال وجهه المستهلك لسلعه تاني خالص مش مهمه ولا محتاجها و مكتفاش بكدة بس, لا , قالهم اشتروا سكر, خدوا بفلوسكم كلها سكر, مش مجرد انه عايز يوجهه لسلعه استهلاكية مش مهمه للاطفال, دة يصرفوا بفلوسهم كلها عليه, دة بأهختصار بداية المجتمع الاستهلاكي ف مصر اللي بدأ مع السادات و الانفتاح الاقتصادي بس بطريقة خفيفة و لطيفة

و في الاخر بينهي تبريره للكلام بحاجة غريبة جدا, ان احلي شئ في الدنيا السكر, حتي اسألوا ابريق الشاي, هو وجههم كدة للشخص المسؤول عن تأكيد وجهه نظرهم و هو ابريق الشاي, اللي هو مش حاجة معينه يعني

 

 المقطع التاني:

كان يا مكان قفطان لونه أحمر لبساه أمورة اسمها مرمر وقطط رومي وديك فيومي وانا وانتم قاعدين نتنقور حاجة ظريفة وعال العال بعدين فجأة حصل زلزال أتاريه الفيل أبو زلومة عمال يرقص في الأدغال
جوة الأدغال الهندية، الفيل بيغني أغنية، ويقول أنا وأنت يا زلومتي نشبه سوا أبريق الشاي

 

هنا بيتكلم عن الاغنيا اللي موجودين وقتها و هما

قفطان لونه أحمر لبساه أمورة اسمها مرمر: طبعا القفطان دة موجود في ثقافات كتير ف مش دوله معينه يعني بس في معظم الاحيان بيتكلم عن الامراء و الملوك (" بينما في ثقافات أخرى يُعد القفطان رمزا من رموز الملوك." - ويكيبيديا)   دور كدة ممكن يكون الاسم قريب لاسم مرمر, مش هقول حاجة هنا عشان المشاكل 😁😁

و القطط الرومي طبعا هما القطط السمان اللي استغلوا الانفتاح و بقوا اغنيا جداً بسبب اللي حصل في البلد في الوقت دة

وديك فيومي: الديك الفيومي اللي هما الناس الاغنيا المتأصلين في الثروة من زمان, حتى المشهور هناك بحيرة قارون, اللي المفروض الاسطورة ان فيها فلوس يعني

و انا و انتوا اللي هما المصريين الغلابة  قاعدين نتنقور, دة العادي بتاعنا يعني نتريق على الاغنيا طول الوقت , لحد ماظهرت قوه جديدة داخله علينا, ماشية مبسوطة بنفسها و فرحانه انها بقت مع الناس دي, هل لو قلنا بيتكلم عن السادات و الناس اللي حواليه, اللي ولا اغتنوا بسبب انهم ملوك ولا بسبب التجارة ولا اصلا كان معاهم فلوس, هنبقى بنبالغ؟ معتقدش!

المقطع التالت:

كان في بلاد العجايب، حفلة شاي لتلاتة حبايب، الدبة والبوبي والنملة والتعلب برة ملوش نايب
التعلب قدامهم فات وفي ديله سبع لفات، كل الحفلة قالوا للتعلب ابعد عنا عشر يردات، تعلوبة قال فيها لأخفيها واقلب فناجينها وكراسيها وعشان أغيظكم وأجننكم راح أخبي أبريق الشاي

 

الحته دي بصراحة انا متلخبط فيها واضح ان بيتكلم عن ايام الوحدة اللي قبل الحرب, بين الدبة (روسيا) و النملة ( اللي هي مصر عشان موقفها وقت السادات بقى عامل ازاي) و البوبي( دة انا مش عارف مين )  و جه التعلب (امريكا او اسرائيل) , اللي مش عاجبه كل دة و  قال فيها لاخفيها, و اقلب فناجينها و كراسيها, و قلب الدنيا فعلا و الاصحاب الحبايب مبقوش اصحاب و لا حاجة, و طبعا اللي دخل التعلب و خرج الدب كلنا عارفين انه السادات

 

مين الكلب بقى؟ الدول اللي رموزها كلب هي
المكسيك , مالطا, مقدونيا, تركيا

كله ماعدا تركيا علاقتنا بيه كويسه, المرجع هنا انا مش فاهمه اوي. ممكن دول تانية حلفاء لينا وقتها ؟ او دوله كانت حليفه لينا بس صلاح جاهين مش بيحبها ؟ مش عارف اوي, انت تفتكر اية؟

 

المقطع الرابع :

كان (ايه) في (ايه) واحد مزيكاتي،كان (ايه) في (ايه) واحد مزيكاتي، ومعاه صاحبه مألفاتي،ومعاه صاحبه مألفاتي، غرقت بيهم المركب عاموا عاموا عاموا عاموا لجزيرة القرصان زناتي، الاتنين كانوا طوال وعراض انكمشوا بفعل الأمراض بقوا كده من الأمواج الساقعة والسمك البلطي العضاض القرصان قال اقفوا كويس آم قال قال احنا كده كويس يلا نخش عليه ونميس ونغني ابريق الشاي

 

دة اجمل مقطع بصراحة, لو قلنا ان كل اللي فات صحيح , فهما بيتكلموا عن نفسهم  سيد الملاح المزيكاتي و صلاح جاهين المألفاتي, و وصلوا لجزيرة القرصان زناتي ( القرصان اللي المفروض بيحكم الجزيرة حكم قرصانه يعني – المعنى واضح) ف هما حاليا في مصر بعد حكم السادات, كانوا مصريين طوال و عراض, و انكمشوا بفضل الامراض و الامواج الساقعة و السمك البلطي العضاض

, لو عايز تعرف اكتر عن اللي حصل ممكن تسمع اغاني للشيخ امام بتتكلم عن السادات و اللي عمله في البلد ( اواة المجنون ابو برقوقة – البتاع – عن موضوع الفول و اللحمة – كان في بلدنا غول امريكا- بيان هام- بوتيكات – و حاجات تانية كتير)

 المهم يعني انه قالهم اقفوا كويس , اتعدلوا يعني و اتكلموا عدل

اللي فعلاً مش عارف السادات كان عامل اية في البلد و حرية الصحافة, دة جزء من مقال في المصري اليوم و فيه زيه كتب بتتكلم عن السادات و اللي عمله

 

" كتب توفيق الحكيم خطاباً إلى الرئيس السادات بخط يده وقعه أكثر من 100 كاتب وأديب وعلى رأسهم نجيب محفوظ ولويس عوض ويوسف إدريس وألفريد فرج:

«لقد كثر الكلام عن المعركة دون معركة حتى صارت المعركة مضغة فى حلوقنا لا نستطيع أن نبتلعها ولا نستطيع أن نلفظها. لما كان الشباب هو الجزء الحساس فى الأمة وهو الذى يعنيه المستقبل أكثر من غيره فهو لا يرى أمامه إلا الغد الكئيب، أما بقية المواطنين فهم يعيشون بالنسبة إليه فى حياة صعبة سيئة الخدمات، وهذا يقتضى النظر فى تغيير بعض الإجراءات التى تسير عليها الدولة ومنها حرية الرأى والفكر وحرية المنافسة».

ولم يستجب السادات وإنما قام بفصل 64 كاتباً وصحفياً من الذين وقعوا على الخطاب، ودفع بعض الكتاب الموالين لشن حملة فيها الكثير من الإسفاف على الكبار من الموقعين وعلى رأسهم نجيب محفوظ. ونشرت الصحف أسماء أبرز كتاب مصر مقرونة بصفة العملاء الخونة! وقال السادات إن الحكيم عجوز استبد به الخرف ويكتب بقلم يقطر بالحقد الأسود."

فالسادات مكانش مخلي حد عارف يتكلم و لايقول رأية

 ف واحد عبقري زي صلاح جاهين, تفتكر يعمل اية لما دة يحصل معاه, النكته الحقيقية انهم كتبوا اللي عملوه في الاغنية فعلاً !

 فقالوا لبعض يلا نخش عليه و نميس و نغني ابريق الشاي , و فعلا عدوا اغنية بتتكلم عن الانفتاح و القطط السمان و اسرائيل و القرصان اللي بيحكم الجزيرة تحت اسم ابريق الشاي, و القرصان مخدش باله  بالعكس دة قعد يرقص معاهم في الفيديو و هما بيغنوا, اللي هو يعني قرطسوه تمام

بصراحة انا مش عارف كل دة مقصود و لا انا اللي مكبر الموضوع, بس في كذا حاجة

1-     موقف صلاح جاهين و سيد الملاح السياسي كان معروف, زي موقف السادات كدة

2-     الصدف كتيرة اوي في الاغنية على انها تبقى صدفة

3-     اخر مقطع بتاع يالا نخش عليه و نميس و نغني ابريق الشاي, ملوش اي علاقه بسياق الاغنية, تحسه محطوط قصد 

انا كان ممكن ازود و اقولك ان في الاغنية لما راحوا للبقال, الخلفية كلها كانت احمر و ازرق زي علم امريكا, و الحلواني الخلفية خضرا زي علم مصر قبل الثورة , بس كدة ممكن يبقى اوفر شوية

 

بالمختصر يعني

لو شايف ان صلاح جاهين كان قصده كدة, ف هو عبقري كدة كدة و لو علمها كدة يبقى اقوى افيه سياسي في الدنيا, اخدلوا 30 40 سنه عشان ناخد بالنا

لو كل دة شايفه صدفة ف دي حاجة كويسة برضة, ياريت يكون الكلام كان مسلي, و كويس انك مش بتصدق اي وجهه نظر و خلاص, في ناس مصدقة ان الكورونا فيروس مش حقيقي و الارض مسطحة و حاجات كدة, فأنا احب احييك مرة تانية

 بقلم: محجوب ابو عجوة

مع بنات التيك توك في سجنهم

 

مع بنات التيك توك في سجنهم

 

لو انت بتحب تقرا لطه حسين, فأكيد اخدت بالك ان العنوان هو شبه كتاب "مع ابي العلاء في سجنه".

كام نقطة سريعة كدة عن ابو العلاء

1-     كان عايش من 1000 سنه تقريباً (اتولد 973 ميلادياً و مات1057)

2-    في ناس اتهمته بالالحاد و انتقاد العقائد الدينية, و في ناس نفت الكلام دة زي طه حسين و ناس تانية

3-    انه كان حاسس انه مسجون, كلامه عن سجنه كان

 

أُراني في الثَّلاثةِ من سُجُوني فلا تَسألْ عن الخَبرِ النَّبيث

لِفَقدِي ناظِري، ولِزومِ بيتي وكَونِ النفسِ في الجِسمِ الخَبيثِ

 

هو كان شايف ان سجونه التلاته هما العمى, و اعتزاله الناس, و جسمه اللي بيخليه يغلط

 

مش هنتكلم هنا عن فلسفه ابو العلاء, دة مش موضوعنا خالص, احنا بس عايزين نشوف بعد 1000 سنه تقريباً اية اللي اتغير في الدنيا؟

 

حاليا في 2020 في بنات اتقبض عليهم بتهمه الاعتداء على قيم الأسرة المصرية  عشان كانوا بينزلوا فيديوهات فيها رقص و هزار(حنين حسام ...مودة الأدهم ...منار سامي ...ريناد عماد ...دينا مراجيح ...“شيري هانم” و”زمردة”)

 

ابو العلاء اللي ارائه الحاديه بالنسبة لبعض الناس كان سجنه في جسمه و اختياره انه يبعد عن الناس, البنات دي اتحبست فعلاً, عارف يعني اية في الحبس؟ طبعاً انا متخيلك بتقولك يستاهلو, هما اية اللي وداهم هناك و كل الخرا الفكري دة, بس فكر ثانية بس معلش ,الحبس لمجموعة بنات صغيرين دة تدمير لمستقبلهم, و بهدله لعيلتهم, فاهم يعني اية؟ حد بيعمل حاجة عادية مرة واحدة يتقبض عليه, لو لسه مش فاهم ف انا بقولك دي حاجة وحشة

 

الحقيقة مفيش حاجة اتغيرت من الف سنه, الموضوع اسواْ بكتير

العمي اللي كان موجود عند ابو العلاء, بقى عند الناس كلها, الناس مش فاهمه يعني اية جريمة ولا حرية, مش عارفين يتعاطفوا امتى و يغضبوا امتى

-        رجل دوله او رجل اعمال فاسد و حرامي و قاتل و سارق

= بس دة كبيرفي السن حرام عليكم يا كفرة!

-        بنات صغيرة بتهزر و بتتدلع عادي

= دول بنات قليله الادب, لازم يتحبسوا!

 

اعتزال الناس مبقاش عشان اسباب فلسفيه عميقة, لا خالص, انت مهما كان رأيك لازم تسكت و تعتزل الناس عشان المشاكل وعشان الخناقات و الشتايم وعشان تشتري دماغك, سواء كان رأيك انك زعلان ان في واحدة انتحرت, او ان الدكتور العالمي الطيب دة ممكن يخش الجنة!

 

الجسم اللي بيخليه يغلط دي مش حاجة ممكن نتكلم فيها اصلا, الناس كلها عندها سعار جنسي, الناس على الفيس بوك مش بيتكلموا غير عن المرأة و جسم المرأة وحرام المرأة ترقص وغلط المرأة تبين كتفها الشمال ,المجتمع لازم يحبس البنات اللي مش مكسوفه من جسمها و حاسه بالعار من ناحيته  ,لو اتكلمنا كتير كل الناس هتزعل من نفسها المفروض, بس الفكرة اكيد واضحة

 

 

والحقيقة انا مش عارف كل ملابسات القضية, و مش عارف اية تاني متوجه ليهم, لو في تهم تاني يبقى المفروض تتقال و يتم البحث فيها, ماشي, القانون ميزعلش حد, بس لازم ناخد وقت نفكر شوية كدة في قيم الأسرة المصرية  و هنا عايز اسأل شوية اسأله مهمه

 

 

السؤال الاول: انهي اسرة فيهم؟

 

انهي اسرة بتتكلم عنها؟ الاسرة اللي عايشه في العشوائيات و مش لاقيه تاكل؟ ولا الاسرة اللي في قصر كبير مقفول عليهم و متعرفش انك موجود اصلاً, مفيش حاجة ثابته اسمها الاسرة المصرية, كل طبقة و كل تصنيف ليه حياته الخاصة بيه و قيمه الخاصة بيها, التعميم على حاجة مش موجودة دة غريب و مش مفهوم, اية الاتفاق العام على تحديد انهي فيهم الاسرة المصرية و لازم نمشي على تقاليدها هي بالذات؟

 

السؤال التاني: اية القيم اللي بتتكلم عنها؟

 

هل القيم دي هي الحاجة اللي اتقالتك ولا تعبت نفسك عشان تدور شوية

احب اخدك في رحله جميلة عن شوية حاجات كدة كانت و لسه بتحصل في اماكن كتير, عشان تعرف ان مفيش معني ثابت ل قيم الأسرة المصرية  

-        زي مثلا ما انت بتسمع البنت زي الولد مهيش كماله عدد, لا خالص الرجالة بتخلف بال 10 عشان خايفين من شكلهم لو مخلفوش ولد, عشان البنت بالنسبه لهم عار

-        سمعت قبل كدة اغنية قولوا لابوها ان كان جعان يتعشى؟ احب اكملهالك,
قولوا لابوها ان كان جعان يتعشى دم البنية ساح و غطى الفرشة
عادي جدا من قيم المجتمع الدخله البلدي لو تسمع عنها, دور لو مش عارف اية دي

-        زمان كانت بيوت الدعارة مقننه و بيتكشف على البنات بصفة دورية عشان يتأكدوا انهم مش هينقلوا امراض

 

هل دي القيم اللي انت بتتكلم وبتدافع عنها, اعتقد هتقولي لأ و دي حاجات مبالغ فيها و مش دة اللي اتعلمناه

ايوة دي حقيقي, مش دة اللي اتعلمناه عشان انت سمعت غلط مش اكتر

 

لو عايز رمز من رموز الاسر المصرية في طفولتنا هو مسلسل يوميات ونيس, علمنا اية بقى يوميات ونيس من ضمن القيم بتاعت الاسرة غير كل الكلام الحلو دة, علمنا ان التنمر شئ عادي جدا في الاسرة المصرية ,عادي تتريق على حد شكله مش عاجبك ( عبله الهبله مثلاً) حلوة القيم دي ؟

 

 

 السؤال التالت: هي القيم دي موجودة من امتى؟

طيب يا سيدي, كل دة كان غلط و انا شايف الجانب السئ و بتكلم عنه و سايب القيم الحقيقية

 

امتى بقى كان اللي عملته البنات دة غلط؟

 

دي سعاد حسني

و دي هند رستم

 

رموز في السنيما والفن, و محدش قال عنهم كلمه, رغم ان هند رستم دي كانت ملكة الاغراء, اشمعني بقي؟

 

فريد شوقي ملك الترسو, بيتكلم على انه بيشرب عادي بس مش بيعمل كدة قبل التمثيل عشان لازم يبقى مركز

 

الحشيش شئ اساسي في مصر من زمان, و لسه زي ما هو ,اكيد على الاقل بتسمع عن كل قعدات الغنا بتاعت الشيخ امام و احمد فؤاد نجم

 

دة حوار من فيلم من فيلم أنف وثلاث عيون | 1972

- هتفضل مكشر كده لحد امتى؟
-- لحد ما اعرف إيه اللي بينك وبين عصام !
- البوي فريند بتاعي
-- بوي فريند !! ليه ؟ إحنا في باريس ! أومال أنا أطلع إيه ؟
- أنت كمان البوي فريند بتاعي
-- إزاي تسمحي لنفسك تعرفي راجلين في وقت واحد ؟
- بذمتك أنت ما عرفتش اتنين ستات في وقت واحد؟
-- أنا راجل !
- وأنا ست !!

 

نقفل النقطة دي بقى بأغنية لام كلثوم بتقول

 

يا حبيبي ياله نعيش في عيون الليل
ونقول للشمس تعالي، تعالي
بعد سنة، مش قبل سنة
دي ليلة حب حلوة
بألف ليلة وليلة،
بكل العمر هو العمر إيه غير ليلة

لو مش فاهم يعني هي بتشرح الليله اللي هيناموا فيها سوا, اسأل بقى اي حد كبير قوله عيب, هيقولك انت مجنون, دي ام كلثوم !

الخلاصة يعني

لو في قيمه واحده كويسة نتكلم عنها  هي حرية الفكر والمعتقد , انك تقبل الناس التانية طالما محدش بيأذي حد, تفكر و تغير رائيك لو في حاجة غلط مش لازم طالما قلت كدة يبقى دة الصح على طول!

, روايات نجيب محفوظ كلها افكار بتناقش الالحاد و الجنس و كل الافكار المثيرة للجدل, و الناس كانت بتقرا و تفهم

الناس كانت فاهمه ان الجنس حاجة عادية, موجوده, بتتعامل معاها عادي, لما تكبتها هتبقي مكبوت جنسياً ومريض و بتبص علي الستات اللي ماشيه في الشارع عشان تتحرش بيهم, بتفكر في مراتات اصحابك و تبقي خايف يشوفوها لحسن يفكروا فيها

اة كان في افكار ملوثه و عنصرية , دة عشان احنا بشر! عشان مفيش حاجة اسمها الاسرة المصرية الواحدة اللي ليها تقاليد ثابته,مش الصح انك تاخد الافكار الغلط دة و تبقى عايزها تكبر

 

تخيل لو انت عايز تقول رأيك ف حته كل الناس ضدك, و انت شايف انك الصح, هتنبسط لما تتحبس, ولا هتحب الناس تسيبك تقول رأيك؟

 

انا عارف انت حاسس البلد اتحسنت اد اية بعد ما اتقبض عليهم, بس عندي فكرة اية رايكوا نفرج عن البنات اللي بترقص, و نركز في السرقة و الاختلاس و الغش التاجري و النصب و القتل و التحرش و الاغتصاب و الاتجار في المخدرات و الخيانة و الحاجات الفرعية دي, و سيبوا البنات دول ف حالهم معلش؟

 

بقلم محجوب ابو عجوة