بحبك يا مرسي يا اعظم رئيس
عشان انت ثوري و مدني و بيس
مع انهم حذرونا و قالولنا
بتلعب معانا عروسه و عريس
وشوف كام جماعة بقالك يا مرسي
بحبك يا مرسي
بحبك يا مرسي يا حامي الحمي
يا واخد ف فن النضال اوسمة
و عمرك ما نسقت مع حزب وطني
و كل رموزه كارهم عمي
من اي فِل خبيث ابقي حارسي
بحبك يا مرسي
بحبك يا مرسي يا ثوري يا جامد
و حصوة ف عين كل حاقد و حاسد
يا ناس بخروه دي ام ايمن قالتها
حسد البلاد لينا علي مرسي وارد
رقيتك بعربي و تركي و فارسي
بحبك يا مرسي
بحبك يا مرسي و بكره شفيق
شفيق مين يا عالم ده راجل خنيق
ميحكمنا عسكر مدام م اللومان
هرب مرسي منه و اصبح طليق
يا متفك حبسك ما تحكم بحبسي
بحبك يا مرسي
بحبك يا مرسي و عاوز ابايعك
و لجل عيونك ابيع اللي بايعك
و ان كرسي مصر صغير عليك
كرسي الخلافة اكيد يبقي سايعك
ما صفوت حجازي قالهاله نِفسي
بحبك يا مرسي
بحبك يا مرسي يا رجل الورع
الكدابين قالوا عندك صرع
قال ايه عشان نوبه كام مره جتلك
قالوا الكلاب ان مخك لسع
فشر ده انت قمري و نجمي و شمسي
بحبك يا مرسي
بحبك يا مرسي يا ابو الامريكان
يا اسطورة خطط و تكتك كمان
يا زارع ولادك ف وسط الاعادي
عشان يتخموا و ياخدوا الامان
لعيب سياسه ولا تقولش ميسي
بحبك يا مرسي
بحبك يا مرسي يا عالي الكاريزما
ملازمني حبك يا عياط ملازمه
و اللي يقول عنك استبن قوله
دلوقتي الاستبن هيكون له لزمه
عشان الاساسي نايم مفسي
بحبك يا مرسي
بحبك يا مرسي و ان اتقال كِشر
وقالوا ان بوزك ده فقر و عكر
اول ما قالوا لوحدك هتكسب
البورصة وقعت و شعبك خسر
عشان بس قالوا عليك ناوية ترسي
بحبك يا مرسي
بحبك يا مرسي يا مرعب يا مرعد
يا مُنقِذ بلادنا يا مُنهِض يا مُنجِد
بحبك عشان نهضتك من دماغك
ولا يقولوا شاطر ولا يقولوا مرشد
يا خيبة املنا اللي راكبة ف كرسي
بحبك يا مرسي
بحبك يا مرسي بحبك اوي
ف حبك و نارة بقيت مستوي
قناة السويس يلا بيعها لقطر
يا ابو المفهومية رئيس فهلوي
ما هي الدنيا اصلاً بقت ماشية عكسي
بحبك يا مرسي
بحبك يا مرسي اكتر من امي
و حبك يا مرسي بيسري ف دمي
و رحت انتخبتك انا و كل شعبك
عشان كل شعبك جاهل و امي
ده من حسن حظك و من كتر نحسي
و بحبك يا مرسي !
ليست هناك تعليقات:
إرسال تعليق