تعاطفي مع السيد عبود الزمر كونه قضي داخل السجن – او المعتقل بمعني أصّح – إبان النظام الاستبدادي السابق اكثر من مدة الحكم القضائي الصادر ضده , لا يتعارض مع معارضتي الشديدة لما جاء ليعرضه علينا من عروض فكرية جهادية سلفية , بل لا يتعارض مع معارضتي الاشد له هو شخصياً لأسباب سأعرضها فيما بعد..
لذلك فأنا وقفت في صفوف المعارضين لشخص كان هو في الاساس معارض سابق للنظام السابق و للنظام الاسبق من النظام السابق , ولا اعتقد اني سأتعرّض للهجوم منه أو من مؤيديه , أو من معارضين آخرين لما اعرضه من أفكار و آراء تتعارض مع ما يعرضونه هم ايضاً من أفكار و آراء , لأن تعرّضي لمثل هذا الهجوم من هؤلاء المعارضين سيتعارض بالضرورة مع حرية التعبير و عرض الأفكار و الآراء .
بالطبع سيعارضني احد المعارضين عندما يقرأ ما اعرضه من رأي و يقول معترضاً : يا عم احنا ف عرضك مش فاهمين حاجه .. مالك معرّضها اوي كده ؟؟!!
كلمنا بالهجايص عشان نفهم..
حاضر
أولاً
انا كنت بتكلم بالهجايص اصلاً
ثانياً
ممكن عشان اسهل الموضوع شويه اهجص بالعامية الفصحي ( من ده علي ده يعني) ..
عم الشيخ عبود ( كما يحب ان يطلق عليه) و للامانه لا اعلم هل هو شيخاً لكبر سنه ام لأن السجين السابق كبير في المقام ام ان المشيخه هي رتبه دينيه..
فقريبه السجين السابق ايضاً طارق الزمر حاصل علي دكتوراه , لذلك فلقبه دكتور طارق و ليس شيخ طارق.. فهل لأن عبود الزمر لم يستطع ان يحصل علي لقب (دكتور عبود) فأصبح ( شيخ عبود )؟؟
اللــــــــــــــــــه اعلم... مش هفتي بقي , ده شئ ميخصنيش و ميهمنيش اساساً,
عموماً عم الشيخ عبود ( مش هنزعله اهو و هنقوله شيخ عبود , مع انه مزعلنا من ساعة ما عرفناه ) ابهرنا بحواراته اللوزعية مع مقدمي البرامج في المحطات المختلفه..
بالمناسبه .. مقدمي البرامج هما اللي جريوا ورا الشيخ عبود عشان يسجلوا معاه بحجة وهمية هي ( الديمقراطية الحقيقية بعد زوال الديكتاتورية المباركية) في حين ان الموضوع كله سبوبه اعلانية – إعلامية للقنوات و للسادة مقدمي البرامج , خصوصاً و أن الكل عارف افكار الراجل ده كويس, و ان معظم الشعب متخوف من ان الاخوان ينطوا ع الحكم زي ما كان النظام السابق بيقول ( لو مبارك وقع و جمال وقع يبقي البلد هتقع في ايد الاخوان )
و انا شخصياً مع اني رافض للنظام السابق لكني اجده في هذه النقطة عنده بعض الحق .. و البشاير اهي هلت علينا بتأييد الاخوان – مع الوطني و السلفين – للتعديلات الدستورية .
تناسي اصحاب المحطات عن عمد و عن سبق الاصرار و الترصد ان اللي شارك ف عملية قتل الرئيس السابق انور السادات بعد اصدار فتاوي بتكفيره و اهدار دمه - لمجرد اختلاف في التوجهات و وجهات النظر- لا يستحق ان يتم تقديمه كبطل قومي علي الشاشات التلفزيونية , بل يجب الا تتم استضافته من الاساس لحماية البسطاء و السذج من الشعب الذين قد ينقادون وراء افكارة لمجرد انه يتكلم بإسم الدين و انه بيقول قال الله و قال الرسول و ان اسمه (شيخ) عبود..
نروح بقي للجزء الاهم في الموضوع , و هو اراء الشيخ عبود نفسه , الراجل قال عدة نقاط منها :
- انه هيرجع الجزية تاني , ولي علي ذلك تعقيبين :
الاول انه قال ان الجزية لأهل الذمة هتبقي زيها زي الزكاة اللي بيدفعها المسلمين . احب اوضح للشيخ عبود ان المسيحيين بيدفعوا حاجه اسمها العشور لمساعدة الفقراء و المحتاجين ( ده علي اساس ان الجزية دي هتروح للفقراء زي الزكاة لإصلاح الخلل الطبقي المجتمعي ).
تاني تعقيب انه قال ان الجزية دي عشان لما مصر تحارب دولة صليبية - هو لسه في دول صليبية؟؟!! - المسيحيين يا عيني ميقفوش يحاربوا اخواتهم الصليبيين و هما متضايقين ومتضررين انهم بيقتلوا مسيحيين زيهم ! شوف إزاي !!!؟؟ و لما المذيعة الست مني الشاذلي ربنا يكرمها قالت له ان المسيحيين قاموا بالثورة زي المسلمين بالزبط و حاربوا في 73 زي المسلمين بالزبط و ان دي بلدهم زي المسلمين بالزبط , قالها اصلهم كانوا بيحاربوا يهوووووود ..
أتاري العملية كده و محدش واخد باله غير الشيخ عبود !!!
رجعت الست مني قالت له طب ما هم حاربوا الانجليز و خرجوهم من مصر, ابتدا يتلخبط و يتهته شوية و بعدين قال الموضوع مختلف ..
(طبعاً ده علي اساس ان الانجليز دول اكيد مش مسيحيين عشان كده المسيحيين اللي في الجيش المصري حاربوهم مع اخواتهم المسلمين عادي من غير ما يزعلوا.. و انا عن نفسي حبيبت اتأكد من الموضوع ده ف لحظتها و عملت بحث و تدقيق في الابحاث الزمريه اتضح ان الديانه ف انجلترا هي السيخية , و في اقليات راستفارية زرادشتيه محشية .. و دول بيتمركزوا ف وسط بحر المانش بالزبط في جزيرة اسمها الزمرستان).
و بعد مانا تعبت في البحث بتاعي لحد ما عرفت المعلومات القيمة دي قام الشخ عبود قال نقطه جوهرية فاصلة قطعت الشك باليقين هي ان كان بين المسيحيين بتوع مصر و المسيحيين الوحشين بتوع انجلترا اختلاف مذهبي منهجي عقيدي طائفي توجهي , عشان كده كان الموضوع بيس و محدش كان مضايق ولا حاجه...
أتاري العملية برضه كده و محدش واخد باله غيربرضه الشيخ عبود !!
طبعاً ده علي اساس ان العراقيين لما حاربوا الكويتيين خلوا الجيش العراقي كله شيعة عشان الجيش الكويتي كله سُنه , و اكيد الجنود المصريين اللي بعتهم مبارك هناك - ضمن قوات ائتلاف دولي مكون من 33 دولة اخري غير مصر ضد العراق - كانوا مسيحيين بس عشان يبقوا ولا مسلمين سُنه ولا مسلمين شيعه , و بكده يبقي الجيش المصري في السليم و يعرف يحارب بنِفس! .
- نقطة تاني قالها عمنا الشيخ عبود انه هيقعد كل الستات ف البيوت , و انه يُحرم منح المرأة حق التصويت أو الترشح لأي منصب من المناصب , ليه بقي ؟
لان الستات لا يصلحن الا للأنجاب و تربية العيال و ارضاء جوزها ( و انتوا فاهمين طبعاً المقصود بالارضاء ) فالمرأة غالباً معظم جسدها عورة ( ده لو وحشه ) أو جسدها كله ( ده لو حلوة ).. ميصحش أنها تخرج من بيت أبوها إلا لبيت جوزها و بعد كده منه للقبر عدل ..
يا راجل ده كلام ؟ معني كده ان الستات لازم يتنقبوا بقي حتي لو مسيحيات , و الا يبقوا كاسيات عاريات بقي وتقيم عليهم الحد , و مش بعيد تقيم الحد و الاتنين و باقي الاسبوع (معاهم) و تاخدهم ملكات يمين .. شرعي بقي !
- نقطة تاني حلوة اوي قالها انه هيقطع ايد السارق عشان يحرم يعمل كده تاني, و بالمرة لما يضرب المربوط يخاف السايب ..
طب افرض واحد جعان سرق رغيف عيش عشان ياكل.. هنقطع دراعه؟
طب لو واحد مليونير هبش كام مليون ده بقي نقطع له ايه ؟؟؟
انا من رأيي اننا ممكن نبدأ عملية التقطيع من الصوابع عقلة عقلة لحد باقي اعضاء الجسد الاهم حسب الحاجه اللي اتسرقت.. و سلم لي علي حقوق الانسان ! .
بس عارفين لو الشيخ عبود نفذ الموضوع ده فعلاً .. انا هبيع كل اللي حيلتي و اخد توكيل اطراف صناعية ف مصر, و انا متأكد اني هبقي مليونير ف ظرف كام شهر .. لأن البلد مليانة حرامية و مليانة ناس مش لاقية تاكل .
- طبعاً كل الامور بعد كده هتخضع للفتوي .. و ده ف حد ذاته كارثة !
لأن الشيخ الجليل عبود الزمر كفرالسادات بفتوي واسقط شرعيته بفتوي و شارك في قتله بفتوي !
و طبعاً كلنا عارفين ان .. طالما مفيش قانون يحكم , يبقي كل شيخ ممكن يفتي ,وممكن فتوي تتعارض مع فتوي تانية , لأن كل واحد بيفسربكيفه بحسب مبدأ اعمال العقل..
مش عارف ليه خير اللهم اجعله خير افتكرت بفتوي ارضاع الكبير فجأه كده بدون سبب خالص !
طب سؤال خبيث بقي .. افرض يا عم الشيخ ان واحد استصدر فتوي بقتلك, هترضي بالفتوي ؟؟
عموماً كنت احب اعرف رأي الشيخ الجهبز عبود الزمر في امور غربية من نوعية البورصه و البنوك الاجنبية و الاجهزة الحديثه و شرعيتها و حاجات كتير كده لو كتبت واحده واحده مش هخلص !
الخلاصه :
انا عن نفسي اعتقد ان الجيش ساب عبود الزمر يخرج لوسائل الاعلام عشان هو عارف انه هيقول اراءه السلفية اللي هتخلي الناس ترفضه , لأن اقامة دولة دينية ( اساسها الفتاوي - لا تؤمن بالديمقراطية – تعيد عصر الحريم – تستخدم سلاح التكفير – تفرق بين مسلم و مسيحي – لا تحترم حرية و آدمية و حقوق الانسان ) اكيد ضد مبادئ الثورة , منبقاش شيلنا طاغية باسم الشرعية الدستورية و جيبنا طاغية بإسم الدين .
بقلم : بنجراوي نوفل رطاط لملوم القفل
like gedan ya welad
ردحذف