نقدي (اللي مالوش اي قيمة علي الاطلاق) لمسلسلات رمضان بعد اول اسبوع من رمضان :
#حواري_بوخارست : امير كرارة متوهج ، محمد بكير المخرج بيعرف يطلع منه احسن حاجه .. كبير يا امير.
عمرو مصطفي متولي ممثل جامد و من القليلين اللي موهبتهم في التمثيل اقوي من ابهاتهم او امهاتهم.
احمد صلاح حسني بعتبره احسن لعيب كرة اتجه في التمثيل .. ممكن اعتبره موهوب في التمثيل اكتر من الكورة اساساً .
ثراء جبيل ( البنت اللي كان ابوها عيان) متمكنه اوي و جمالها هادي اوي و دورها شكله هيبقي حلو اوي اوي .
مشاهد الاكشن حلوة و متقنه بشكل كبير ، الصورة حلوة ، الموسيقي التصويرية حلوة ، و السيناريو و الحوار ممتاز و اغنية التتر قوية زي كل اغاني تترات مسلسلات امير كرارة.
ده غير ان المسلسل بطولة سارة سلامة يا جماعة .. سارة سلامة.. يعني لازم يتشاف.
#مولانا_العاشق : مش قادر افهم سر نمطية اداء مصطفي شعبان !
ليه مش عاوز يغير اداءه مع انه ممثل جامد !
هل الناس بتحبه كده عشان كده هو مش بيحاول يجدد اداءه ؟
حاسس اني بتفرج علي مسلسل قديم ليه ، الحاج او افندينا او مولانا نفس شخصية الدكر ابو سبحه اللي الستات كلها بتحبه -بالمناسبة المسلسل مليان مزز- و لازم يكون ليه لازمه بيقولها كل شوية زي (معانا يارب ، كله بما يرضي الله ، يتوب علينا ربنا) .. مش قادر افهمه بصراحة !
#الف_ليلة_وليلة : المسلسل المفروض كله قايم علي الجرافيك ، انا شخصياً شايف ان الجرافيك ضعيف ، يمكن لأني اساساً متابع جيد للدراما الاجنبية اللي الجرافيك فيها بيبقي علي اعلي مستوي .. عموماً المسلسل ممكن يتشاف باعتباره اول تجربه حقيقيةع لعمل درامي مصري مبني علي الجرافيك بشكل اساسي.
#استيفا : مبدأياً الفلاش باك الكتير اوي كل حلقة ده سخيف جداً ، المسلسل المفروض دراما بوليسية مصرية .. مش مقتنع بدور مني زكي اوي لأني عمري ما شفت محققة (Detective) في مصر ..
المسلسل استنساخ ماسخ لمسلسلات من نوعية csi و ncis الامريكية باجزائها ..
الحوار ضعيف و ركيك في المُجمل .
الاخراج مش قد كده.
الموسيقي التصويرية سيئة جداً و ملهاش علاقة بالاحداث .
عباس ابو الحسن ممثل قوي جداً و حضوره طاغي ، ابو سريع موهوب ، شيرين رضا حكاية و مستحيل تكون خمسين سنه لدرجة انهم لما حبوا يطلعوها بسنها الحقيقي استخدموا مكياج يبينها عجوزة !
و كالعادة زكي فطين عبد الوهاب قادر يوقع اي مشهد حتي لو متكلمش ، ري-اكشناته لوحدها كفاية..
#اوراق_التوت : مش عارف الناس دي عاوزة ايه .. المسلسل ضعيف جداً و معظمة ممثلين مش لاقيين شغل .. الحوار غريب و مضحك ، الجرافيك حسيت انه كارتوني و مش طبيعي ، المونتير ضعيف جداً و طبعاً الاخراج من نفس مستوي باقي الكرو بتاع المسلسل ..
عموماً اي حد هيشوف المسلسل و مستواه هيعرف دوغري انه انتاج حكومي.
#مريم : هيفاء مختلفة و بتطور كممثلة ، خالد النبوي اداءه بقي طبيعي اكتر بعد ما اشتغل في السينما الامريكية ، ريهام عبد الغفور تجنن ، السيناريو و الحوار لطيف ، الاخراج لحد دلوقتي عادي مش مبهر .
#يا_انا_يا_انتي : المسلسل ده اقل حاجه في رمضان علي جميع الاصعده ، اداء الممثلين ( الاسماء الكبيرة بالاخص) كارتوني و مفتعل و مبالغ فيه ، بس مين هيعرف يمثل لو معاه سيناريو و حوار زي ده ، حاجه ضايعة يعني .. مش هقول اكتر من كده .
بلاش تضيعوا وقتكم في الفرجة عليه.
#بعد_البداية : اول بطولة مطلقة بجد لطارق لطفي بعد سنين تمثيل ، طارق لطفي ممثل جامد و جامد اوي .. خالد سليم عبارة عن شنب .. درة جميلة .. فاروق الفيشاوي عودة حميده بعد غياب طويل.
القصة شكلها مثيرة ، السيناريو و الحوار حلو و الاخراج كمان حلو .. اعتقد لو في وقت غير رمضان المسلسل كان خد حقه اكتر ، بس عموماً ممكن ارشحة انه يبقي مفاجأة رمضان السنه دي .
#حق_ميت : المسلسل شكل قصته لطيفة ، حسن الرداد ابتدي يبقي ممثل تقيل له كاريزما مش بس راجل بيعتمد علي وسامته، احمد عبد العزيز رجعني سنيييين لورا ، مش بس عشان بقالي كتير مشفتلوش مسلسلات ، لكن عشان اداؤه و طريقة تمثيله قديمة .. تمثيله حلو مفيش شك بس قديم .. تسعيناتي.
صبا مبارك ممثله شاطرة و ملفته.
الحوار حلو .. الاخراج مش عبقري بس مش ضعيف .
#البيوت_اسرار : مجاش قدامي ولا مره !
#الصعلوك : حاجه عبقرية علي جميع المستويات..
خالد الصاوي بيعيد اكتشاف نفسه بأداء فوق الخارق ..
الحناوي كاتب سيناريو و حوار اقل ما يقال عنه انه عظيم ، واضح جدا سبب تمسك خالد الصاوي بالمؤلف الخصوصي بتاعه ، الكيميا و التفاهم اللي بينهم واضحة جداً.
طبعاً الاخراج هايل ..
باقي الكاست قوي.. علي سبيل المثال لا الحصر , رحمه حسن اداءها جميل علي طريقة السهل الممتنع .. فيدرا كالعاده عالية .. حماصه (مش عارف اسمه للاسف ) عامل دور حلو اوي برضه ..
كل الكاست عالي ما عدا حمدي الوزير اوفر جداً
#تحت_السيطرة: للاسف مش لاقي وقت اشوفه .. بس نيلي كريم و مريم ناعوم مش هيعملوا مسلسل وحش
#استاذ_و_رئيس_قسم : عادل امام .. بس كده.
#شط_vip : مع احترامي للجميع .. مين دول و بيعملوا ايه في رمضان ؟
#لهفة : مسلسل لطيف ، خفيف علي القلب ، في كمية ضحك حلوة و فيه افيهات كتير مكتوبه بحرفنه من اللي بتجيب ضحك من جوة ..
دنيا طبعاً شايله المسلسل كله علي كتافها ، موهبه جبارة و غير عادية و تتحب من اول نظرة .
محمد سلام .. باشا باشا .
#العهد: النوع ده من المسلسلات لازم يتشاف علي رواقه بعد رمضان .
#يوميات_زوجة_مفروسه: كمية استظراف غير عادية .. افكار الحلقات كلها قديمه و زي ما تكون اسكتشات مجمعه كام نكته علي كام افيه ..
#بين_السرايات : لو هشوفه يبقي عشان سيمون و بس.
#ارض_النعام : مظنش هشوفه.
#وش_تاني : عاوز اشوفه.
#ذهاب_وعوده : ليه اشوفه ؟
#الكابوس : ممكن اشوفه.
#مولد_وصاحبه_غايب :مشدنيش رغم وجود اكبر عامل جذب ممكن يشد اي راجل سوي .. مفهوم طبعاً بتكلم عن مين ...
بس باسم سمرة عامل دورة كويس مع انه مش جديد عليه ، يعتبر هو هو بتاع تيته رهيبه ..
طبعاً فيفي هي فيفي بتمثل برقبتها بس .
حسن الرداد هنا اقل بكتير من حسن الرداد بتاع حق ميت .. عشان مان لسه مستواش اوي وقتها ، المسلسل بقاله ٣ او ٤ سنين ممكن تلاحظوا الفرق ده في ملامح هيفا .
#الكبير: مكي ممثل موهوب ، بس مش كتر الشخصيات اللي هيقدمها في المسلسل هو اللي هيخلي المشاهد يأمن بموهبته ، كده كده مكي اثبت نفسه و خلصنا .
خروج هدية و فزاع من الجزء ده اثر كتير علي تماسك المسلسل ، طبعاً حاولوا يتغلبوا علي الجزئية دي بالسفر بره و الصرف الكتير .. بس روح المسلسل اختلفت كتير بعد فقدان شخصيتين رئيسيتين المشاهد ارتبط بيهم من سنين.
في كوميديا و ضحك طبعاً مفيش كلام .. بس الروح اختلفت عن الاجزء اللي فاتت.
اي مسلسل عموماً مش مفروض يبقي وان مان شو .. و ده مش تقليل من مكي خالص.
#ظرف_اسود : عمرو يوسف مش مجرد واد حليوة عنيه ملونه طلع مع نور الشريف من كام سنه في الدالي و اتشهر بعدها ،
عمرو يوسف ممثل تقيل و فاهم بيعمل ايه و بيركز اوي في اختياراته .. لو اتجه للسينما اعتقد هيعمل لنفسه تاريخ .
صلاح عبدا لله عالي اوي المره دي ، فعلاً كرهني في المحامين
البزاوي عامل دور عمره.
تايسون عالي اوي .
السيناريو و الحوار حلو ..
بس الاخراج احلي من احمد مدحت .
#حالة_عشق: اتظلم مع انه متشاف كويس ، انا عارف البلوت تويست و الزتونه بتاعه المسلسل بس مش هقولكم عليها .. اهو غلاسه كده
#لعبة_ابليس : اول مسلسل تكتبه انجي علاء زوجة يوسف الشريف و للامانه مكتوب حلو ..
يوسف الشريف اداءه مختلفش كتير عن اي مسلسل له ،
نفس فريق العمل تقريباً اللي هو بيشتغل معاه دايماً .. مسلسل حلو يتشاف اكيد
