رابعه

مشهد

استوديو توك شو

ل/ د

--------------------------

احد استديوهات الهواء داخل مبني التلفيزيون المصري , المذيع جالس و معه احد الضيوف

الضيف:

طبعا قاعدين معتصمين ف رابعه  و بيقبضوا الفلوس اللي بتجيلهم و هما مفخدين .. يشتغلوا ليه ولا يروحوا ليه 

اذا كان كل واحد فيهم بياخد 50 جنيه ف اليوم غير الوجبات !!
ملعون ابو بقي عجلة الانتاج اللي وقفت و اقتصاد البلد اللي بيحاولوا يخلوه نهار عشان مرسي بتاعهم يرجع!!

طب مرسي مش راجع .. و موتوا بغيظكم .

المذيع : 

و معانا اتصال من احد المشاهدين طلعت من القاهرة .. اتفضل يا طلعت

المتصل : 

الحقيقة انا مش هاخد من وقتكم كتير .. انا بس عاوز اقول علي اللي بيحصل ف اشارة رابعه دلوقتي 

المذيع : و ماذا يحدث هناك يا استاذ طلعت .. يا ريت توضح لنا

المتصل : 

طبل .. و زمر ..  و مخدرات .. و علاقات جنسية كاملة  !!

المذيع : 

تقصد حضرتك جهاد النكاح ؟

المتصل : 

اه بس دي التسمية المؤدبة .. انما هو لا مؤاخذه علاقات جنسية كاملة , 

بالبلدي كده هناك في مليطة جامده جداً و في ناس هيجانه مش عاوزه تمشي بسب الموضوع ده

المذيع : 

اشكرك يا سيد طلعت ..
هل عندك تعليق سيدي الضيف ؟

الضيف : 

في الواقع اللي استاذ طلعت بيحكيه ده اتحكالي من احد سكان منطقة رابعه اللي قاللي ان في حد من المعتصمين

خبط عليه الباب و طلب منه انه يختلي بواحده بيقول عليها مراته الخلوة الشرعة ..
الناس هناك عايشه ف مأساه حضارية بكل المقاييس ..
بقوا ميقدروش يفتحوا الشبابيك عشان بيشموا روائح قذرة

اطنان من الزباله ف رابعه العدوية

تقولش زريبة .. عشان بيزعلوا لما يتقال عليهم خرفان !

زائد ان المعتصمين هناك عفنوا وجالهم جرب من قلة الاستحمام

مش كده و بس

ده غير فيديوهات كتير بتورينا ان بعض المعتصمين كانوا بيقضوا حاجتهم ف الشارع عيني عينك

ده غير التلوث الضوضائي

الساكن اللي يتهف ف نافوخه و يفتح شباك ولال بلكونه هيصدع من الدوشه و الازعاج ليل نهار
الاخوان لا هاممهم ان في سكان ف رابعه منهم ناس عيانه او عجائز محتاجه للراحه !

يا راجل ده الناس مبقوش عارفين ينزلوا من بيوتهم ولا يروحوا اشغالهم .. اللي داخل يتفتش و اللي نازل يتفتش و حاجه قرف !

  

المذيع : 

معانا اتصال من احد المعتصمين في رابعه

المتصل :

يا ناس حرام عليكم 

اتقوا الله

الناس اتقتلت و هي بتصلي الفجر

المذيع :

عفوا سيدي .. ناس اتقتلت و هي بتصلي ؟

المتصل : 

ايوة.. ف الركعه التالته كمان حوالي الساعة 5 الا ربع كده 

حسبي الله و نعم الوكيل

المذيع :

عفوا سيدي و لكن اذان الفجر بيبقي الساعة 3 و ربع !

المتصل : 

ايه يعني ؟

المذيع :

و صلاة الفجر ركعتين فقط !

المتصل : 

ايوة يعني عاوز ايه مش فاهم !!

المذيع : 

طب ماذا سيستفيد السيسي من قتل ناس بتصلي الفجر حسب روايتك

المتصل :

بيقتلهم لأنه ضد الاسلام

المذيع :

ولكن السيسي رجل مسلم سيدي

ثم ان الصور التي التقطوها توضح ان المعتصمين كانوا يلبسون احذيتهم و في غير اتجاه القبلة !

المتصل :

ربنا هينصرنا عليكم يا كفرة يا اعداء الدين

و مرسي هيرجع و هنخلص عليكم واحد واحد يا ملاعين يا انجاس يا كلاب امريكا 

الضيف : 

واضح ان الاخ المتصل نسي ان قيادات جماعته هي اللي وقفت ع المنصة ف رابعه و طلبت تدخل امريكا , و طلبت منها و من الاتحاد الاوروبي ضرب مصر عشان سي مرسي يرجع .. الخونة !
طب اقوللك حاجه .. مش انت بتقول ان في ناس ماتت ؟؟
ايه اللي وداها هناك !!!

المذيع :

معانا اتصال تاني .. معاذ من امبابه اتفضل سيد معاذ

المتصل :

اقسم بالله الداخلية البلطجية معاهم سلاح و بيضربونا بيه 

المذيع :

وضح لنا ماذا حدث سيد معاذ

المتصل :

احنا كنا رايحين نهجم ع القسم لقينا كلاب الداخلية بيضربوا علينا خرطوش 

المذيع : 

ولكن اقتحام الاقسام جريمة و من حق الشرطه اننها تضرب نار علي المقتحمين

المتصل :

احنا مكناش رايحين نقتحم .. احنا كان لينا ناس جوا محبوسه كنا داخلين نهربهم مش اكتر

حسبي الله ف الداخلية الكفرة البلطجية !

الضيف:

شايفين العقلية اللي بتتكلم .. رايح يقتحم قسم و متضايق ان الشرطه ضربت عليه نار و بيتهمهم بالبلطجة !

طب ايه قولك بقي ان الداخلية مفيهاش خرطوش ؟!

المذيع : 

معانا اتصال اخر من الزميلة حياة الدرديري انثي العكش

مساء الخير استاذة حياة

حياة :

مساء الخير علي حضرتك و علي ضيفك الكريم .. الحقيقه انا عاوزة افجر مفاجأة ف برنامج حضرتك , 

انا لبست نقاب و دخلت اعتصام رابعه علي اني واحده من المعتصمات .. طبعاً ده بتوجيهات دكتور توفيق عكاشه,

المهم انا صورت كل اللي بيحصل هناك

المذيع :

ايه بالضبظ اللي بيحصل هناك ؟

حياة :

الحقيقة ان كان في خيام مخصصة لجهاد النكاح .. و انا دخلت واحده منهم و لقيت فيها ازايز ويسكي و حشيش و شرايط منع حمل و واقي ذكري و ترامادول و ترابيزات بلياردو و بنج !

المذيع :

و حضرتك كنتي بتعملي ايه ف الخيمة دي يا مدام حياة ؟

حياه :

هه؟

المذيع :

و حضرتك كنتي بتعملي ايه ف الخيمة دي يا مدام حياة ؟

انتي سمعتي السؤال متستهبليش

حياه :

انا مش بستهبل بس واضح ان في مشكلة ف الارسال الصوت مش واضح , في عطل ف الاتصال

المذيع :

كده حضرتك سامعاني كويس ؟

حياه:

اه

المذيع:

و حضرتك كنتي بتعملي ايه ف الخيمة المشبوهه دي يا مدام حياة ؟

حياه:

في الواقع انا شفت الخيمة من بره كانت بتتهز جامد .. قلت اشوف اللي بيحصل مش اكتر ..

المذيع:

اي اضافات اخري ؟

حياه:

انا حابه بس اضيف ان ابو تريكه خاين و ان دكتور توفيق زعيم الامة

المذيع :

شكراً للزميلة انثي العكش .. اي تعقيب سيدي الضيف؟ 

الضيف :

ويسكي !! ويسكي يا معفنين !!

المذيع :

ناخد اتصال اخر .. استاذ ابو القعقاع من رابعه

المتصل :

السلام عليكم

المذيع :

و عليكم  السلام .. حضرتك من سكان رابعه ؟

المتصل :

نعم

المذيع:

صف لنا ما يحدث عندك

المتصل :

بسم الله الرحمن الرحيم الحمد لله رب العالمين والصلاة والسلام على نبيه الصادق الأمين خاتم النبيين و اشرف المرسلين  أفضل العالمين سيدنا ومولانا رسول الله محمّد عليه افضل الصلاة و السلام على آله وأصحابه الطيبين الطاهرين ومن أهتدى بهديه واستن بسنته إلى يوم الدين

لحظة صمت

لحظة صمت

لحظة صمت اخري

المذيع :

سيد ابو القعقاع هل مازلت معي

المتصل:

نعم

المذيع :

اذاً اجب عن السؤال

المتصل:

اي سؤال؟

المذيع :

صف لنا ما يحدث عندك

المتصل:

انتظر لحظة

(صوت احدهم يوشوشة)

المعتصمون هنا سلميون جداً و في غاية الرقي و الحجارة

انتظر لحظة

(صوت احدهم يوشوشة)

عفواً اقصد الحضارة .. و كل ما يروج عن الاعتصام هو كذب و افتراء 

انتظر لحظة

(صوت احدهم يوشوشة)

عاوز اضيف ان السيسي كان بيضرب نار ع المعتصمين فعلاً , و ان في مئات من الشهداء و الجرحي  عند الحرس الجمهوري من جميع الاعمار ,

انتظر لحظة

(صوت احدهم يوشوشة)

و ان الرئيس الشرعي مرسي راجع بإذن الله .. 

انتظر لحظة

(صوت احدهم يوشوشة)

و انا مش اخوان بس مؤيد للشرعية  و بحيي قناة الجزيرة

المذيع :

حضرتك شفت بعينك القتلي عند الحرس الجمهوري؟

المتصل:

ايوة يا فندم انا بقيت واقف ف الشباك و شايف الجيش و هو بيضرب نار ع المعتصمين العزل و هما بيصلوا

المذيع:

كبف تري القتلي عند الحرس الجمهوري و انت تسكن امام الاعتصام في رابعه كمان قلت

لحظة صمت

لحظة صمت

لحظة صمت اخري

المتصل (بعصبية شديده):

السيسي خائن و عميل و صهيوصليبي و قاتل

الضيف :

شفت حضرتك اتعصبت ازاي دلوقتي و صوتك راح ..
و انا سأعوضك أن تقبل مني بونبوني ماركة هولز أُهديت إليّ ولكن أخصك بها نظراً لما سببته لك من أضرار 

تييت تييت تييت

المذيع :

يبدو ان الاتصال انقطع

الضيف:

انقطع مين يا استاذ .. منتاش سامع اللي كان بيمليه يقول ايه ؟ لما اتزنق و كدبته بانت معرفش يرد و قطع الخط ..

عموماً في قتلي عند الحرس الجمهوري ؟ ماشي يا سيدي 

اللي ماتوا دول هنبقي نعمل لهم لجان تقصي حقائق ، و لو ثبت انهم مش مخبوطين ف مكروباص ولا ف خناقه هنبقي نصرفلهم معاشات و تعويضات

المذيع :

معانا اتصال اخر من ام ايمن

ام ايمن:

انا عاوزه اقول ان المصريين هيندموا علي الجوهرة اللي اسمها محمد مرسي اللي كان العالم كله بيحسدنا عليه , لأن الدولة كانت صاعدة بسرعة البرق , و احب اقول انه راجع و هيصلي معانا ف القصر في ليلة من ذات الليالي ,

و احب اضيف ان السيسي خطفني و امر جنوده يتناوبوا اغتصابي و حسبي الله و نعم الوكيل

الضيف :

انا من موقعي هذا بقدم بلاغ ضد السيسي بتهمة التعذيب الوحشي للجنود بإجبارهم علي اغتصاب ام ايمن .. يا ريت بتوع حقوق الانسان يحققوا ف الموضوع ده !
بس غالباً ام ايمن كانت لابسه عبايه بكباسين

المذيع:

تحب تختم بإيه سيدي الضيف؟

الضيف:

احب اقول ان المعتصمين دول شوية عملاء ممولين 

و ان قطع الطرق بلطجة

و ان اللي بيعملوه ده ضد العرس الديمقراطي

و ياريت نفعل قانون متع التظاهر

عشان المعتصمين دول خربوا البلد

و من الاخر اللي مش عاجبه يروح تركيا

و من الاخر اكتر لو مرسي رجع هنولع البلد

--------------------

قطع

 بقلم بنجراوي نوفل رطاط لملوم القفل

و اشتاق جداً

احبك جداً

و اشتاق جداً

و اكره حقيقة شوقي اليكِ

و اكره حقيقة كرهي لذاتي

في البعد عنكِ

و اكره جمودك و اكره عنادك

و اكره بشدة عند ابتعادك

خضوعي المحتم

الي كبريائي

الرافض بحزمٍ و حسمٍ نهائي

ان ادنو منكِ

فيزداد كرهي الي كبريائي

و يزداد ايضاً .. شوقي اليكِ !

 بقلم بنجراوي نوفل رطاط لملوم القفل

يا مرساااهُ ... ارحل

شلنا مبارك

إذ الوضع ساء

و جبنا الخروف

قام ركبنا و ساق

كان في ما بيننا

و بينه اتفاق

فخان اتفاقنا

و ساد الجفاء

و اخون بلدنا 

و نشر الوباء

سنه و بس عدت

قام الشعب فاق

و زلزل ميدانه

و طلب الجلاء

و قال لك فينيتو

جه وقت الجزاء

مش رأي جبهه

دي كل الاراء

محمد يا مرسي

يا اس البلاء

بيقولوا ناسا

لقوك ف الفضاء

بقولها بأمانه 

و من غير رياء

باهرني ادائك

و بئس الاداء

غباء ف السياسة

و سياسة الغباء

يا مُرساااهُ ارحل

فلبي النداء

هترحل يا مرسي

ماهو الشعب شاء

هترحل بكيفك 

او بالخناق

هترحل يا بومة

يا مقطف يا داء

اقولها بلغتك ؟

يا مُرساااهُ : ماااء 

 بقلم بنجراوي نوفل رطاط لملوم القفل

ابتسم للدنيا

مين فيكوا محبط ؟ وحاسس كدة انه مش طايق نفسه و خلاص هيطق من جنابه ؟

لو انت حاسس بكدة يفضل متقراش عشان هتتضايق زيادة 
اصل يعني .. الواحد هينبسط من اية ؟في اية في الدنيا دي ليه معني اصلاً؟هتقولي بقي التفاؤل و ابتسم و الكلام الفاضي دة... اسمع الاول و قولي رايك
وانا قاعد كدة في ساعة صفا افتكرت كدة ايام الطفوله .. المدرسة .. اد اية كانت طفوله ملهاش معني .. دراسه بتعلمك تحفظ و متفهمش مدرسين يكرهوك في حياتك و يطلعوا عليك عقدهم ... خناقات و حاجات هايفة ... تهديدات من المدرسين بالسقوط - مع انه مش ف ايديهم المفروض- ناس بتغشو بتنجح و انت شايف ان اللي اتعلمته ان الغش غلط دة اي كلام .. ماهم بينجحوا اهو ممكن تمر ان واحد صاحبك يموت في حادثه 
تفضل بتفكر انك بكرة لما تكبر هتبقي انسان احسن و هتعمل و هتعمل ... تدخل ثانوية .. قلق و تعب اعصاب و توتر و ارهاق مذاكرة ... مذاكرة ...مذاكرة ... مذاكرة و دروس .. دروس كتير من غير لازمه .. و فلوس بتتصرف .. علي امل انك تتخرج بمجموع.. و في الاخر ؟؟ ممكن تدخل كليه قمه .. او كليه سفح .. و الاتنين انيل من بعض
القمه تفضل تذاكر ميت سنه و في الاخر متلاقيش شغل .. و السفح 50 سنه بسو مش هتلاقي شغل برضة !تقول لا !!! انا مش هسكت علي نفسي انا هاخد خطوة مختلفه ... و تفضل تاخد كورسات و تقرا و في الاخر تدخل في داء بلدك .. ان محدش بيشتغل اللي هو عايزة .. تقول دي فترة مؤقته .. و تفضل الايام تجر بعض لحد ماتنسي اصلا انت عايز ايةدايما الواحد مبيبقاش طايق نفسه وهو رايح ! طب لية كدة ؟
الواحد يدورعلي حاجة تفتح نفسهالسياسه مثلا؟ لا تعليق
الناس في الشارع ؟ حالات التحرش و السرقة و التثبيت بقت اضعاف.. مبقتش تضمن و انت نازل انك هترجع اصلا 
احمد خالد توفيق قال جمله رائعة: الأعوام تغير الكثير .. إنها تبدل تضاريس الجبال .. فكيف لا تبدل شخصيتك
حتي نفسك .. الحاجة الوحيدة اللي ضامنها ... مش مضمونهمجرد خاوطر ملهاش معني
كنت اتمني في الاخر اقولك ام دة هزار و الدنيا مش كدة .. لو عندك راي تاني احب اعرفه اكيد ..
لو فضلت عايش لحد ماسمعه .. اتمنالك حياة افضل من كدة

بقلم محجوب ابو عجوة

سلو بلدنا كده !

عاوز افتح موضوع بس بلاش الاقي بنت تقوللي انت مش رومانسي , او ولد يقوللي انت تافه ,

او اي حد اتعمل له الموضوع ده او عمله لحد يفتكر اني بتكلم عليه !

اطلاقاً .. انا بتكلم من وجهة نظر تانيه خالص

عاوز اتكلم عن الـ proposals !! 

الفترة اللي فاتت كتر فيها موضوع الـ proposals اللي بيعملها الولاد للبنات ..

فكرة الـ proposal بتاع بلاده قبل تمصيره ان العلاقه بين الراجل و الست مش شرط تنتهي بجواز , يعني ممكن يبقوا بيحبوا بعض بقالهم كتير و جايز كمان عايشين مع بعض بس عمرهم ما اتكلموا ف موضوع الجواز !! 

عشان كده الولد بيبقي واخد مخاطرة انه يجيب خاتم و ورد و ينزل نص ركبه قدام الناس عشان عارف انها ممكن ترفضه , و هي كمان بتبقي متفاجئه فعلاً .. 

و ده اللي بيدي الموضوع معني و بيخليه حاجه كبيره اوي و مهمه عند الطرفين

و بيخلي كل طرف سواء اللي نازل علي ركبه و نص او اللي واقف علي رجليه الاتنين قلبه عمال يدق سواء من الخوف او من الفرحه ..

ده الـ proposal تقفيل بره .. 

انما بتاع مصر هنا ده ايه معناه ؟

الولد اصلاً لو قال للبنت انه معجب بيها بتقوله كلم بابا .. او ع الاقل بتحكي لمامتها 

و يبدأ بقي النقاش حوالين هو بيشتغل ايه و عنده شقه ولا لأ و ناوي يتقدم رسمي امتي و الجو ده ..

الحب عندنا اخره الجواز - و معنديش اعتراض علي كده علي فكرة - ف لما الولد بيقول لواحده انا بحبك

 ده معناه انه بيقول انا عاوز اتجوزك ,

هل بقي لو انا و واحده متفقين علي كل حاجه , و قعدت مع اهلها و دخلت البيت من بابه و كل الكلام اللطيف ده,

 و ماشي حسب الترتيب المصري الوطني المحلي, لو جيت بعد كده عملت الـ proposal و جبت خاتم و ورد و مفاجأه و عملت شو كان تحفه و شغل عالي .. ده يبقي ليه لزمة فعلاً ؟

هل ده يبقي اسمه proposal اصلاً ؟

و هل ممكن شاب ف مصر يعمل proposal لبنت من غير ما يبقي ضامن مليون ف المية انها هتقول موافقه ؟!

و انها مش هتحرجه و تخلي شلكه وحش قدام الناس اللي بتتفرج و اللي غالباً بيبقوا اصدقاء الطرفين

و عاملين لها "قال ايه " مفاجأه !

و هي اصلاً هتقول لأ ازاي و ليه طالما هما الاتنين اصلاً متفقين علي كل حاجه 

نهايته ..

انا مش ضد الموضوع ..

انا شايف ان الـ proposal علي الطريقة بتاعة بره ده قمة الرومانسية .. 

بس بتاع مصر ده مش شايف له معني .. 

ممكن نغير اسمه لأي حاجه تانيه لأنه "تقنياً" مش proposal من اساسه ..

عشان محدش هنا بعمل proposal رومانسي غير لما يكون عامل proposal رسمي و شرب القهوه مع حماه الاول.

حد عنده اقتراحات ؟

طب حد رأي مخالف ؟

عموماً انا بحترم المعارضه زي مرسي بالزبط علي فكرة

و سأحاوركم بالحب والقرارات اللي هتتاخد هتبقي مشاركه لا مغالبه و النتيجه هتكون بالتوافق

:D

 بقلم بنجراوي نوفل رطاط لملوم القفل

يوميات مواطن في عصر النهضة

استيقظت علي اصوات هتاف بعض شباب الالتراس في الشارع المجاور لي .. لا بأس لقد اعتدت علي ذلك

هم يطالبون بالقصاص و هذا حقهم ..

هؤلاء المساكين شاهدوا قتل اصدقائهم امام اعينهم في مباراة ملعونه قبل سنوات و لم يأتي القصاص بعد ..

اعذرهم في كل ما يفعلوه .. الحقيقة انا اعذر اي مواطن مصري فيما يفعله اياً كان في عصر النهضة

اقدر تماماً ما يحملونه من غضب في صدورهم .. فأنا غاضب ايضاً

لكني تكيفت مع الوضع .. تملك مني اليأس و اعلم ان غضبي لن يغير شيئاً

الشعب منهك غير قادر علي الثورة من جديد

حتي شباب الثورة و الالتراس مخترقون من الاخوان

جبهة الانقاذ عاجزه عن الانقاذ 

باقي الشعب مثلي يائس و يحلم بعودة ايام المخلوع .. لسان حاله ليت المخلوع يعود يوماً !!

منذ عدة اشهر تمني البعض نزول الجيش من جديد عقب احداث العصيان المدني في بورسعيد و عده محافظات

بل و قام البعض بعمل توكيلات تطالب الجيش بإدارة امور البلاد 

يالهم من حمقي و سذج !

قلت لهم وقتها ان هذا لن يغير في الوضع شئ ..

و ان الجيش لن يقدم علي خطوة كتلك إلا اذا ثار الشعب من جديد و منحوا محمد مرسي لقب المخلوع اسوة بمبارك,

قلت لهم ذلك و انا اعلو ان شئ كهذا لن يحدث

فالاخوان قد تمكنوا من مفاصل الدوله

و من البرلمان و مجلس الشوري الذي لا اعلم جدواه حتي الان 

و لم يكن لمقاطعة الاحزاب المدنية للانتخابات دخلاً بما آلت اليه الامور من اكتساح للاخوان 

فالشعب اكثريته نحت خط الفقر و هو ما اراده محمد مرسي و عصبته

قبل الانتخابات بدأت مؤتمرات الحرية و العداله و معها بدأ توزيع الزيت و السكر و الخضروات التي تحمل شعار الحزب

مع مقولات من نوعية نحمل الخير لمصر

و بالتالي المواطن الجاهل الفقير الذي لا يساوي في اعين الاخوان سوي هذا الثمن البخس يعطيهم صوته الانتخابي علي مضض

فهو يحتاج ان يأكل ولا يجد من يطعمه .. و الجهة الوحيده التي تمتلك المال هي الاخوان بالطبع

الدوله لا تهتم كثيراً بما وصل اليه حال الفقراء .. فكلما زاد فقرهم اصبح شراء اسواتهم الانتخابية اسهل

ولا تهتم بالتعليم كذلك .. فكلما زاد الجهل زادت القاعدة الشعبية التي من المحتمل ان تنتخب الحرية و العداله

لم يعد الوازع الديني هو ما يحرك فقراء الشعب في العملية الانتخابية , فالاخوان يتدعون انهم الاسلام و الاسلام  هو الحل , 

لكن كذلك السلفيين يقولون ليلاً و نهاراً انهم هم المسلمون الحقيقيون و ليس الاخوان , بالاضافه لبعض الاحزاب الاسلاميه الاخري

المتنوعه و المتدرجة في التشدد الديني ..

يالغرابة هذه الجملة : احزاب اسلامية !

أليس ممنوعاً انشاء احزاب دينيه ؟!

اتعلمون ما الغريب في الموضوع

الغريب هو استغرابي .. فمن المفترض انه لم يعد شيئاً غريباً في عصر النهضه !

مازال البرادعي متمسكاً بمبادئه و يقول دائماً ان الثورة سلمية ولا يشجع علي العنف ,

و مازال حمدين معترفاً بشرعية الاخوان برغم كل ما ارتكبوه من جرائم في حق الشعب و الوطن 

و مازال علاء صادق يتغني بحمد محمد مرسي و يعدد فضائل الاخوان

و مازال ابو اسماعيل يقود تابعيه ليحاصر ما يريد و من يريد بدون ان يردعه احد , و مازالت السيده والدته امريكية و لم يثبت العكس

و مازال ابو الفتوح يحاول ان يمسك العصا من المنتصف .. فلا يغضب الثوار ولا يغضب الاخوان

كم اكره هذا الرجل .. يتدعي انه انفصل عن الجماعة في حين انه لا يختلف في مواقفه عن مواقفها ولا في ارائه عن ارائها

ليس له لون واضح .. شفاف اللون .. فاتر الطعم لا هو بارد ولا ساخن .. يصعب علي امثالي قبوله او بلعه !

علي اي حال

ها هي النتيجه تشير الي تاريخ اليوم 25 يناير 2015 

مازال مرسي العياط  منجعصاً في كرسي الحكم يأتمر بأوامر الجماعه و من قبلها اوامر امريكا

و مازال قنديل هائما في عالم اخر غير عالمنا 

و مازال الجيش علي الحياد

و مازالت الشرطه تقتل في المتظاهرين

كل شئ كما هو إلا حال المصريين اصبح اسوأ

و لكن بالرغم من اخونة القضاء و الداخية 

و تغلغل الاخوان كالسوس في وزارات التعليم و التموين و الاعلام

و بالرغم من انهم اصبحوا يتحكمون في عقول و بطون المصريين

أملي الوحيد ينحصر في اسقاط الاخوان في انتخابات الرئاسه القادمة 

هذا بالطبع إن لم يتم تزويرها و هو امر مستبعد .. و لكن قليل  من الامل لن يقتلني !

اتمني في انتخابات الرئاسة القادمة ان يعلم كل من اعطي صوته طواعية لمرسي انه اخطأ

و ان يعلم كل من اعطي صوته طمعاً في الجنه انه اخطأ

و ان يعلم كل من قاطع او ابطل صوته انه اخطأ

و اتمني ان يشعر كل عاصر ليمون انه ورط الوطن حين انتخب مرسي نكايةً في شفيق

تري هل كان من الممكن ان يكون الوضع اسوأ مع شفيق ؟ ربما .. ولكن ما من دليل

فما نحن فيه الان سئ لدرجه كافيه لنتمني ان يعود بنا الزمن فننتخب شفيق

و لربما نتمني ان يعود بنا الزمن فننتخب مبارك نفسه !!
انها حقاً ايام ملعونه ..

 بقلم بنجراوي نوفل رطاط لملوم القفل

كتاب حياتي يا عين .. 1- السينجل

تنويه هام :  

بعض الاحداث غير حقيقية و الباقي من خيال المؤلف .. لكن هذا لا يمنع من وجود بعض الاحداث التي لا تمت للواقع بصله.

زي ما عودتكم .. لأني كاتب تافه كتبت لكم مقال تافه عاوزكم تضيعوا وقتكم و تقروه ,الموضوع اللي هكلمكم فيه النهارده الحقيقه ميهمش اي حد .. كالعاده !  

طول عمري و انا اصحابي معدودين علي صوابع الايد الواحده..

ف كل مرحلة من حياتي كان بيبقي ليا شله قريبة و الشله دي بس هي اللي بتبقي عارفه كل حاجه عني.

تغيرت الشلل (بكسر الشين) بتغير مراحل الحياة لكن لسه باقي ليا من كل شله واحد او اتنين لسه بنتواصل علطول..

كل ده هري و كلام ميهمش اي حد ..

لكن حبيت اقوله عشان يبقي مدخل لموضوعنا.

علي مر العصور و مع تغير الحقبات الزمنية اللي عديت بيها ، و مع تعد الشلل (مش هفضل كل مرة اقول بكسر الشين) اللي كنت عضو فيها , كنت دايماً الاعذب الوحيد .. بالبلدي كده "السنجل" . رغم كده كنت دايماً العاقل الواعي الخبير اللي بيدي النصايح التمام ف موضوع الحب ، و كنت بتدعي اني عارف مين هيكملوا مع بعض و مين هيفركشوا ..كنت عايش ف دور اسامه منير و انا اساساً مشفتش جنس ناعم غير السيده المصونه و الجوهرة المكنونه امي .. المهم اني كنت  عامل فيها ابو العريف حلال العقد و صاحب الأراء السديده في امور الارتباط.

سامع واحد بيقول غتت "كان الحمار نفع نفسه"

سامعه كويس و الكلمه خرمت ودني بس مضطر اتجاهله لأن كلامه فيه شئ من الحقيقه 1 ( انظر الهامش اخر المقال).

المهم .. تملي السينجل مننا هو الحيطه المايله اللي اي حد بيسند عليها ..

بمعني ان لو واحد عاوز يشوف البنت اللي بيحبها من بعيد ايام ثانوي مثلاً ( شغل المراهقين ) و يطمن عملت ايه ف امتحان الهاي ليفل عندها ف المدرسه يقوم ساحب السينجل معاه و يروح يقف قدام المدرسه و يسأل كل البنات اللي خارجين عن الامتحان اذا كان جه سهل .. ما عدا هي !!!

طب ما تسألها هي ما جايز هي افشل و اغبي طالبه ف المدرسه و مستواها اقل من كل اللي سألتهم ..
ما علينا,

ف مرحلة جامعه بقي
بعد ما يتنيلوا يرتبطوا من ورا اهاليهم يقوم الواد الحبيب (اللي هو صاحبي) جايب السينجل (اللي هو انا) يخرج معاهم قال ايه عشان محدش يشوفهم لوحدهم .. 

سامع نفس الواد الرزل بيقول (اريال يعني ) ..

ايوه اريال بس كنت اريال بمنتهي الحب و الولاء لصاحبي و كنت بيقي سعيد لما بيبقي هو سعيد .. اطلع منها انت 2 .
و طبعاً اي مصيبه تحصل لازم اغطي عليه ، و كنت متأهب طول ال٢٤ ساعه ف اليوم ان حد من البيت عنده يكلمني يسألني عنه و ابقي مجهز الرد المناسب لكل المواقف حتي لو انا مش فاهم في ايه ..
المهم لما اقول لهم رد اصاحبي ده  ميتخزوقش .. من ده بقي تزويغ دروس ايام ثانوي او حوادث بالعربيه لما بيعلم الهانم السواقه لما بقي ياخد عربية ابوه ف الجامعه ..

من اهم مميزات السينجل لباقي الشله انه دايماً بيبقي اغني واحد فيهم ، بنك الحظ المتنقل بتاعهم ..عمره ما يبقي مفلس , و يفلس ازاي و هو معندوش بنت يصرف عليها ، ولا هدايا ولا ورد ولا دباديب ولا برفانات ولا عزومات ولا اي حاجه م الحاجات دي ..

بعض اصحابي من كتر ما سلفتهم كنت فاتحلهم ايامها حساب مفتوح .. و نسيت ليا كام عندهم و بطلت اعد .. و مخدتش فلوسي بس قلت اهو اعتبرهم زكاه عن صحتي و كله لوجه الله و الاخوة و المجدعة  3 . 

سامع نفس الشخصية الرزلة بتقوللي اكيد فيه سر انك طول الوقت سينجل .. اكيد معيوب او فيك حاجه غلط .. بغض النظر عن سماجتك اللامتناهيه و بجاحتك الغير معهودة و رزالتك الاسطورية , إلا اني هحكيلك .. اكيد انا عرفت بنات كتير و حبيت قبل كده .. بس تملي بيبقي في خازوق ف الموضوع و مبقولش ف البنت لكن بقول ف الموضوع 4 .

بما ان الموضوع اتفتح و الكلام جاب بعضه , تعالوا نشوف بعض انماط البنات اللي قابلوني ف رحلة عمري  5  :

البنت المناسبه اللي كنتوا زي الفل مع بعض بس سيبتها ب منتها الغباء لأنك كنت شايف ان ده الصح وقتها نظراً لصغر سنك و قلة خبرتك و لأنها الحب الاول ..

البنت اللي تبقي معجب بيها و متخيل انها مش حاسه بيك و بعد كده تكتشف بالصدفه انها كانت معجبه بيك ف وقت م الاوقات, و ان سيادتك ضيعتها بترددك و حساب الحسابات علي امل انك ف الهنا تبات قال ايه لأنك مش عاوز تكرر تجربة علاقه فاشلة تاني .. و عاوز تدرس طباعها من  بعيد لبعيد الاول .. طبعاً البنت بيجيلها شيخوخه مبكرة و شلل رباعي و جلطه , و حضرتك لسه بتفكر تجس نبضها ولا لأ .. ده ان بقي عندها نبض اساساً .

البنت اللي تحفي وراها لأنها الحلم اللي تبقي فاكر انها اعلي من مستواك بكتير و انها لا يمكن تبصلك لأنها حلوة جداً و  تبقي علطول مرتبطه بواحد تاني  6   .. و اول ما تبقي فاضيه تعرف عنها حاجه تخليك تقفل منها , تقعد بقي تقول يا ريتني كنت عرفت كده من زمان و يا خسارة شرايط كاظم الساهر اللي اشتريتها عشان تسمعها ف ليالي البعد و السهد و الحيرة , لو كنت جبت بفلوسهم مجلات ميكي كان افيد لك .

البنت اللي عاوزة تتجوز و مسروعة علطول و تحسها ماشيه بأرقام كل المآذين ف كل المناطق حسب هي معديه ف انهي منطقة, تبقوا متفقين تاخدوا الموضوع بالراحه و العلاقه تكبر تاتا تاتا لحد ما تكون نفسك و كده .. تقعد تقولك بقي انا حكيت لأختي عنك , و حكيت لماما عنك , و حكيت لبابا عنك , و حكيت لخالتو و خالو  و عمتو من الجيزه و جدو و تيته من الاسكندرية و جميع الاهل و الاقارب بطنطا .. و تلاقي نفسك يا معلم متدبس ف مقابله ملهاش اي لزمه ف التوقيت ده مع عيليتها الكريمة بعكس كل الاتفاقات المبرمه ما بينكم قبل ما تبتدوا الموضوع .. و رغم انك بتقابلهم  , إلا انها بعد اسبوعين بتيجي تقولك انا هتخطب يوم الخميس الجاي .. سيربراااااااااايـــــز !!

البنت المدلوقة عليك لسبب متعرفوش يخليك تقلق جداً .. لدرجة انك ساعات بتحس انك شبه احمد عز 7  و انت متعرفش .

البنت اللي اهلك عاوزين يلزقوهالك , بيبقوا شايفين انها جميلة و ابوها مليونير و مفيهاش حاجه تتعيب , بس انت شايف  ان عيوبها تتلخص ف ان ابوها و امها و اخوها بيكونوا شخصيات لا تطاق,
و ده بيخلي كل حاجه ف الموضوع تبقي مشكله الا هي شخصياً لأنك متعرفهاش شخصياً .. بس غالباً هتبقي نفس طباعهم لأنها مش هتجيب من بره يعني , يقال ان الرزاله دي بتبقي صفة وراثية ف الجينات , و بستثني من القاعده دي محمد عادل امام اكيد طالع رزل لأبو واحد صاحبه .

البنت الدلوعة اللي تعجب بيها من بعيد و اول ما تفتح بقها تقول كلام من نوعية حشتيني و حدش و موس عارف و موس لحقت و حمدولله و تاعتي و نأة و تؤ و زحلانه و يحني و مخامصاك و كل هذا القبيل من الالفاظ و الاقاويل اللي ابتلينا بيها ف مسلسل ساره و تدل علي تخلف عقلي حاد او مشكله ما ف التخاطب .. النوع ده بيبقي نفسك تاكلها قلم و تقولها اتعدلي يا بنت المعووجه و تمشي ... بس مش بتقدر لأنها مزه جداً و لو عملت كده ألف شاب هيحب يوجب معاها علي امل انه ينول الرضا , وهتلاقيه بيديك اللي فيه النصيب من الشتيمه و الضرب و الركل و قلة القيمة , علي ايه الطيب احسن .. اتقهر انا من سكات أكرملي!

او البنت اللي كانت حب الطفوله و غابت و غابت و رجعت من جديد و لكنها رجعت بعداوة بين العيلتين بصورة لا تسمح لكما بالارتباط او الصداقة او حتي التواجد بنفس المكان لأن وصلت العداوة لعداوة اكبر من عداوة اهل روميو لاهل جوليت .

رغم كل ده بس الصراحة يعني انا لسه متمسك بإني اعيش قصة حب ساخنة وعنيفة و تصلح للمسلسلات التركي .. مهند و كريم و يحي و مراد مش احسن مني ف حاجه .. هما بس اطول و اوسم  و اشيك  و اغني مني , مش حوار يعني !

من ضمن الاشياء اللي مخلياني متمسك بأني اعيش قصه حب هي ان ابويا نفسه - الله يمسيه بالخير - عاش قصه حب ملتهبه من و هو عيل ف  اعدادي مع بنت الجيران و ف النهايه اتجوزوا (و طبعا مش محتاج انوه ان بنت الجيران دي تبقي امي ) القصه دي كانت بيتخللها كل التحابيش اللي قلوبكوا تحبها من بعد وقرب و خصام و وئام و دموع و شموع و هدايا و شرايط هاني شاكر  8  و كوبري الجامعه – مع ان الاتنين كانوا ف تجاره عين شمس اساساً- و هجر و عريس تاني حاول ياخد الاميره الجميله من ابويا ( اللي هي امي برضو) لكن ف النهايه ابويا الفارس النبيل قدر يفوز بعروسته الحسناء و اتجوزها  9 .المهم يعني انا مش اقل منه..

و المفروض ان عندي نفس الجينات اللي كانت فيه و خلت بنت الجيران تحبه..

عاوز اخد فرصتي زيه , بغض النظر ان الجيران حاليا مبيخلفوش غير صبيان و ان اكبر بنت جيران عندي اصغر مني ب عشر سنين تقريباً .. لكن ده ميمنعش اني من حقي احلم ببنت الحلال برضه..

مفيش حد يشوفلي عروسه يا ولاد الحلال ؟

عاوزها عندها شقه و عربية و اشتراك ف النادي و مقطوعة من شجرة و وارثه ملايين و يا ريت يكون معاها جنسية تانية, يا كده يا إما الواحد مش ها يوافق عليها 10 .. انا عاوز ادخل شريك بالمجهود بس مش اكتر .

من حقي اتّنك و اتفرعن لأن نسبة العنوسه ف مصر ف ازدياد خصوصاً بعد ما مرسي مسك الحكم و الرجاله عماله بتموت .. ولا ايه ؟ 

للحديث التافه بقية مادام عمر الشقي بقي 

 ---------------------------

الهامش اللي ف اخر المقال :

1- (شئ !؟) 

2- كدب ده كان  علي امل انه يرد لي الموقف ف يوم .. و هو ما لم يحدث .

3- برضه كدب ده كان علي امل انهم يردوا ليا الموقف ف يوم .. كنت مفكر اني لازم هتزنق ف الفلوس لما ارتبط و هو ما لم يحدث .

4- ف معظم الاحوال علي الاقل .

5- رحلة عمري : اغنية حزينة للنجم الحزين مصطفي كامل الملقب بالفنان الحزين .

6- طبعاً الحلوين علشان حلوين يعملوا كدهو  .

7- اقصد احمد عز اسطورة الحديد و ليس ذلك الممثل الدميم بتاع اعلانات كنتاكي فرايد تشيكن.

8- ايامها مكنش لسه موضوع الدباديب ده انتشر .

9- وهو ما اعتقد انه قد يندم عليه ف بعض الاحيان, ما علينا من النقطه دي .

10- (يوافق !؟)

بقلم بنجراوي نوفل رطاط لملوم القفل