المهزلة اللي بتحصل في اللجنه التأسيسية لوضع الدستور ( الـ قال ايه لا مؤاخذه توافقي )
فكرتني بجملة محمد صبحي ف مسرحية تخاريف
يا شعبي الحبيب الصبور المهاو د , قرار ديكتاتوري رقم .. الخ
طول عمر الشعب ده و هو متعود ان اللي يحكمه يبقي دكتاتور
من ايام الفراعنه
لحد دلوقت ما الدور جه ع الاخوان يحكمونا
طول عمر الشعب ده و هو متعود ان اللي يحكمه يبقي دكتاتور
من ايام الفراعنه
لحد دلوقت ما الدور جه ع الاخوان يحكمونا
بمنتهي الديكتاتورية
و هو ده اللي كانوا بيعملوا علشانه اعتصامات قبل كده ايام مبارك لما كانوا عاملين دستور تفصيل
و كانوا الاغلبية بيهمشوا وجود اي حد غير الحزب الوطني
و اسألوا الكتاتني نفسه في الحكايه دي
مفيش دستور ف النيا بيتكتب كده
ده الحزب الوطني بجلالة قدره معملش فينا كده
انهي دستور ده اللي عاوزين يكتبوه
و توافقي بأمارة ايه
و مين دول اللي جايبينهم عشان يكتبوه
او بمعني اصح يعملوا نفسهم يكتبوه
ليه التمثيل يعني و مصر كلها عارفه ان الدستور ف درج المرشد
و الليجنه اختارها المرشد
بأمارة ورقة البرشام اللي كانت بتعدي ع النواب وقت انتخاب اعضاء اللجنه اللي من برة المجلس
و دي مصيبة تانيه
بس خلينا ف المصيبة الاولي
ليه يعني يبقي نص اللجنه م المجلس
المجلس اللي اهم الحاجات اللي ناقشها ف جلساته
انه يلغي الانجليزي
و يقيم حد الحرابه
و يقفل المواقع الاباحية
و مخدش قرار واحد بيقول ان ده برلمان ثورة
المجلس ده اللي شفنا فيه العجب من اول يوم
من اول قسم اليمين بما لا يخالف شرع الله
و النائب اللي وقف يأذن ف وسط الجلسه و كأن هو الوحيد اللي بيصلي الفرض بفرضه
مع ان الاخوه ف المجلس ماشاء الله كلهم دقونهم قد كده و زبايبهم تسد عين الشمس
ولا التاني اللي راح عمل عملية تجميل ف مناخيره و رجع قالك ضربوني لما عرفوا اني نائب في المجلس
ولا اللي قالك ع الثوار بيتعاطوا ترامادول و نسي ان الثوار دول هما اللي دخلوا اشكاله المجلس
و غيره و غيره ف مجلس الندامة
ليه مجلس زي ده يتاخد منه 50 واحد يكتبوا دستور مصر
الدستور اللي المفروض انه هيفضل ميت سنه قدام
ليه اخلي شوية ناس كل مؤهلاتهم ان دقنهم طويلة شوية و ماسكين سبحه يكتبوا دستور مصر
و اسيب خبراء و فقهاء دستوريين بره اللجنه
طب ما علينا
جبنا 50 نايب م المجلس
طب حد عارف ال 50 اللي من بره دول هييجوا ازاي
حادي بادي ولا كلوا باميه ولا حجر ورقة مقص
واحد هيقولي بالانتخاب
طب ايه آليات الانتخاب ده
محدش فاهم
ماهو مفيش حاجه عندنا تقول ييجوا ازاي الا الماده 60 في الاعلان الدستوري
المادة العجيبة المبهمة اللي كل واحد فسرها علي كيفه
و في الاخر الاخوان قالوا هنعملكم ملف فيه 2000 اسم شخصية عامة
و هنختار منه 50 واحد
ف قد ايه يا ولاد
في ساعه!
مع ان الاعلان الدستوري بيقول في ست شهور
بس هو المرشد عاوز كده
في ساعه قوام قوام قبل ما الناس تفوق
المرشد عاوز كله قوام قوام
انتخابات مجلس الشعب قوام قوام
انتخابات مجلس الشوري قوام قوام
انتخابات اللجنه التأسيسية قوام قوام
عشان الدستور يتحط قوام قوام
و طبعاً الريس يجيبوه قوام قوام
و كله بما لا يخالف شرع الله
و تيجي تكلمهم يبجحوا فيك بمنتهي العنطزه و العنجهية ويقولولك
ايـــه احنا الاغلبيه
ايـــه احنا الاغلبيه
الشعب هو اللي اختارنا
طب ادي الشعب عرف غلطته و مش هيعمل كده تاني
ما علينا من كل ده
مين بقي ال50 واحد اللي من بره مجلس و جابوهم يكتبوا الدستور دول
اللي ما حد فيهم نعرفه ولا سمعنا عنه حاجه
لا احنا ولا الساده النواب اللي مكنش معاهم برشام
ولا حتي اللي كان معاهم
سايبين واحد زي الفقيه الدستوري ابراهيم درويش اللي بياخدوا رأيه في الدول الاجنبيه لما بيكتبوا دساتيرهم
و جايبين واحد زي ابو تريكه
علي اساس انه هيكتب الدستور بـ وش رجله الخارجي
جايبين ناس بكالريوس تجاره و خريجي كليات تربية
و سايبين اساتذة قانون و جهابذة تشريع و ناس اساساً شغلتها انها تحط دساتير
ما علينا برضه
السؤال مهم جدا محدش هيجاوبه من الاغلبية ف مجلس الشعب اللي هو يعتبر سلطة من السلطات في الدولة ..
ازاي تبقي سلطه و تيجي تحط دستور ينظم العلاقه بين السلطات؟؟
هو ده مش يعتبر ف اي قانون في المجرة اسمه تضارب مصالح
ازاي ابقي انا برلمان و عاوز اني ابقي عندي كل الصلاحيات اللي تخليني اسيطر علي البلد
و اجيب نفسي اكتب دستور يديني الصلاحيات دي
ده بأنهي منطق
طبعاً ده سؤال مالوش اجابه.
ده غير ان كل النقابات مسيطر عليها الاسلاميين
ف لما مثلا هنجيب نقيب الاعلاميين ك ممثل عن الاعلاميين في اللجنه
هيبقي كأننا بنجيب واحد م الاخوان
لأن هو اساساً اخوان
و قيس علي كده بقي كل الهيئات و النقابات و الشخصيات العامة اللي جايبينها لنا
و مفيش مانع يحطولنا كام واحد كده ليبرالي ولا علماني ولا حتي شيوعي
مهو كده كده الدستور ف درج المرشد
و هيتوافق عليه يعني هيتوافق عليه
عشان الموافقه بالاغلبية
و الاغلبية 50 + واحد
ال50 اللي هما اصلاً م المجلس
و الواحد ده مش هيغلبوا فيه
و بعدين هينزل الدستور لإستفتاء شعبي
نعم او لا
دستور 200 ماده
هينزل لشعب جاهل
المفروض انه يا يقول نعم يا يقول لا
و طبعاً احنا مبنقولش لا ابداً
ما الل كان بيقول نعم لمبارك قب الثورة
و قال نعم للتعديلات الدستورية بعد الثورة
هو هو اللي جاب الاخوان والسلفيين في الشعب و الشوري
و هو هو اللي هيوافق الدستور بتاع المرشد
و علي رأي الشيخ ياسر البرهامي لما اتحدي الليبراليين و قال لهم :
احشدوا الشعب لكي يقول لا للدستور... ان استطعتم !
و سلملي ع التوافقي ..
و سمعني سلام دستور ايه اللي انت جاي تقول عليه
بقلم : بنجراوي نوفل رطاط لملوم القفل
