النهاردة انا عاوز ادي درس لكل الصحفيين - الغير موهوبين - في كيفية كسب لقمة العيش و الابقاء علي وظائفهم ..
اسم الدرس : النفـــــــــــــــــــــــــــــــاق
ماذا نستفيد من هذا الدرس :
كيف تكون منافقاً في 24 ساعة بدون معلم
ملاحيظ مهمة :
- يجب التدقيق في اختيار من تنافقه .. البعض قد يكون غير قابل للنفاق
- المبالغة في النفاق قد تأتي بنتائج عكسية
- النجاح في النفاق متوقف علي قدراتك .. و انت و شطارتك بقي
مش هقعد ارغي و اقولكم خطوات النفاق لأنها كتيرة و متعددة..
لكن هكتفي بإني اديكم مثال (ممتاز) للتوضيح , انا راجل عملي و وقتي بفلوس ..
اقدم لكم
بعد طول انتظار
اقوي دروس النفاق الحائزة علي جوائز الدولة التقديرية و التشجيعية
ملك الموالسة و التدليس و الطنطنه الكدابة
امبراطور النفاق المعلن و الخفي فوق و تحت الترابزه
استاذ مسح الجوخ بجامعة الصحافة الحكومية (القومية سابقا)
حاصل علي الدكتوراه الفشـ- خرية في علم (سيدي انا ) من جامعة القرع المباشر بالقاهرة
الكاتب الصحفي الساخر الذي طالما سخسخ القراء كثيرا و انقلبوا علي قفاهم من الضحك عليه هو شخصياً و ليس علي ما يكتبه !
قيل عنه الكثير و الكثير من الالقاب التي استحقها بمجهودة الشخصي
ابو شنب ركيك الادب .. مطبلاتي الصحافة عديم النظافة .. قط الشاشة و ابو البشاشة
المخربش
مستر باراشوط .. ممتاز القط
اهم حاجه ف القط انه علي عكس الكلب عديم الوفاء ..
الكلب بيفضل وفي لصاحبة حتي لو صاحبه ده نفسه .. ابن ستين كلب !
لكن القط غدار .. ممكن اوي يبيع سيده ف ثواني
بيعرف يمشي جنب الحيط و ع الحيط احياناً اذا لزم الامر
نرجع لمرجوعنا..
ممتاز القط ياما اتحفنا بمقالاته اللوزعية الالمعية من نوعية :
القط العبقري قدر في احدي مقالاته مثلا انه يهاجم الحكومة ارضاءاً للشعب , و ف نفس الوقت يهلل للريس اللي جاب الحكومة اصلاً !
بس طبعاً عم القط مجابش سيرة النقطة دي .. امال هياكلها والعه ازاي ؟؟!
حدق اوي
المشكله انه فاهم انه بينافق
و احنا فاهمين انه بينافق
و هو فاهم ان احنا فاهمين انه بينافق
و احنا فاهمين ان هو فاهم ان احنا فاهمين انه بينافق
و مع ذلك كان مستمر في النفاق عيني عينك كده عادي !!!
هو ده القدر الكافي من البجاحة اللازم للبقاء علي الكرسي
لا انسي عندما ذكر قصة "طشة الملوخية"
و قال ان الريس كان عاشقا لتناول "طشة الملوخية"،
لكنه وبسبب انشغاله بهموم الشعب أصيب بسدة نفس وتخلى عن معشوقته هذه ولم يعد يتناولها..
يا حرام..و النبي مسكين و صعب عليا !
ولا انسي ايضاً عندما كتب (جواب غرامي) ملتهب الاحاسيس ملئ بالمشاعرالحارة و العاطفة الجياشه و الحب الجارف للريس عندما كان مسافراَ لألمانيا للعلاج..
كلام بقي من نوعية :
"الناس كلها عايزة تاخد تأشيرة.. وتروح المانيا عشان تزورك وتقولك ألف مليون سلامة عليك.."
انا عن نفسي كنت عاوز اروح للريس المانيا .. بس للأسف ابونيه المترو بتاعي لحد الجيزة بس
" بصراحة يا سيادة الريس مفيش حاجة في مصر كلها لها طعم من غير متكون معانا."
شوف ازاي .. و انت بابا و انت ماما و انت انور وجدي كمان..
"صدقني ياريس بكلمك من قلبي.. طول اليومين اللي فاتوا الناس في بلدنا زعلانة أوي.. زعلانين عشان عملت عملية.. حاسين ياريس إن إحنا السبب.. إحنا تعبناك قوي.."
صادق من غير حلفان و الله..
انا نفسي انتحرت لما عرفت ان الريس جتله كرشة نفس بسببي..
"لكن دايما إحنا بننسي.. أصلنا طماعين!! وما صدقنا إن فيه واحد بيحبنا وبيسمعنا وعمره ما زهق ولا هيزهق مننا.. وهنفضل دايما نقولك عايزين وعايزين.. وعمرنا ماهنقولك كفاية.. أصل البحر بيحب الزيادة. وإنت طلعتنا من القمقم يا ريس.. كنا فين وبقينا فين.. معدش حد في وجودك يا ريس ممكن يروح
ورا الشمس.."
لولا اني عندي ثبات انفعالي كنت تلفظت بلفظ شبه ابيح يستخدم في اسكندرية بكثرة و يدل علي الاعتراض.. انا هفترض انكم فهمتوا قصدي و ده مش مجرد فرض طبعاً !
انا هكتفي بالقدر ده من وصلة الغزل اللي كانت في المقالة دي عشان انا دمعتي قريبه و رومانسي .. حسبي الله و نعم الوكيل
--------
بعد الثورة بقي انقلب الحال و سبحان مغير الاحوال اللي مش دايم غيره ..
القط فجأة بقي مع الجيش و مع الشعب ضد مبارك !
صحيح راجل عنده مبدأ
و مبدأة انه مالوش مبدأ
عنده استعداد انه يربي دقنه ويلبس جلابية بيضة قصيرة لو الاخوان مسكوها
او حتي يلم النقطة و يطبل لو اللي هيمسكها رقاصه من شارع الهرم !
تاني يوم ما الريس اتنحي كتب ف الاخبار ف الصفحة الاولي :
القوات المسلحة : "انا الشعب"
وخد عندك بقي ف وصلة تمجيد للجيش و قياداته الحكيمة ..
ماهو لازم ياكل عيش بقي !
ده غير انه كتب عن عصام شرف اللي فجأة بقي (العالم الدكتور رئيس الوزراء) مع انه كان زمان ولا عالم ولا دكتور..
حد عارف ليه ؟
عشان مكانش رئيس الوزراء..
ما علينا
كله كوم و نفاقه ليحيي الجمل كوم تاني
يحيي الجمل اللي كان محظور انه يتكتب عنه حرف ف اي جريده قومية
بقي ( الدكتور الجليل نائب رئيس الوزراء)
و طبعاً عارفين بقي جليل ليه ..
لأن اللي اختشوا .. ماتوا !
المهم ان يحيي الجمل نفسه عشان راجل محترم هو اللي اداله شلوت طيرة من رئاسة التحرير ..
و خسرنا بكده احد اهم الصحفيين اللي ياما متعونا بمقالاتهم المسيلة للدموع من كتر الضحك ..
كفاية كده طولت عليكم ..
يا رب تكونوا استفادتم حاجه من
Excellent the cat
بمناسبة Excellent the cat .. الامريكان عنده مصطلح حلو اوي
بيقولوه لما حد ينافق حد .. اسمه :
kissing the asses
و ده له دلالات مهمة جداً اكيد جت ف بالكم دلوقت ..
مش بس بيطاطي راسه لتحت, لأ ده كمان بيشم ريحة معفنة
بقلم : بنجراوي نوفل رطاط لملوم القفل
