عزيزي ابن مرسي
رئيس شعب غزة
يا غالي عليهم
عظيم المعزة
يا مرسي المراسي
يا ورد الكراسي
بدحرج تماسي
و بهديك ملاحظه
يا مرسي اعتبرنا
عشيرتك و اهلك
و شوف كام مواطن
يا مرساه ندهلك
ليه المصري منسي
ما طول عمره منسي
فينك يا مرسي
ايه اللي شاغلك
مشغول بتعمل ف قصرك بسين
حقيقي يا ريس
الله يعين
و ماله يا ريس عشان الولاد
اصرف يا ريس ده رزق الولاد
حمام سباحة و تراك جياد
مش عيب نخلي الولاد مبسوطين
سمعنا ان حضرة عظمة سعادتك
منحت فخامة معالي سيادتك
كل وسام او نيشان او ميدالية
ممكن ياخدها مواطن ف مصر !
اكيد حضرتك مش مجرد مواطن
اكيد اللي ياخد كل الكلام ده
انسان خرافي سابقنا بعصر
و فيك الف ميزة
بطل بالغريزة
ف فترة وجيزة
اخدت يا ريس بكل الجدارة
و من غير امارة
نياشين كتيرة و ملهمش حصر !
سمعنا ان اخ المدام مرتشي
و مسجون كمان
و انك بجرة قلم مشمشي
خرج م اللومان
و خرجت غيره كتير مسجونين
محكوم عليهم متطرفين
يا ريس بتفرج عن المجرمين
و ناسي اللي ثاروا ف قلب الميدان
يمكن نسيتهم خلاص بعد ما احنا
أدينا دورنا
و جبناك رئيس منتخب باختيارنا
فين كهربتنا؟
طب فين سولارنا؟
نلم زبالتنا
و بنقول قدرنا
عشان شعب طيب
بندفع فلوس الزباله اللي اصلاً
احنا اللي فعلاً
بنلمها
و ندفع معاها فلوس كهربا
لا بنشوفها حتي
ولا نشمها
و ندفع فلوس مية ف الاصل قاطعة
و بيننا و بينها اساساً مقاطعة
طب يرضي مين الكلام ده يا ريس
لو ترضي بيه .. يبقي ندفع يا ريس
و نرضي يا ريس
اقولك يا ريس
رضينا يا ريس !
رضينا يا ريس و شايلين همومنا
و صابرين و مطلعناش من هدومنا
و بنقول هتفرج
مسير الحاله هتعدل ف يوم
لكن كله كوم و الزمالك ف كوم
ده لسه الزمالك مقضيها نوم
كده مش كويس
ده لسه الزمالك بيخسر يا ريس!
ليست هناك تعليقات:
إرسال تعليق