ما كفايه غاغه
و نقطونا بالسكات
دوشتوا راسنا بالبكا
ايه يعني كام عيل و مات ؟
عاملين مناحه و مندبه ؟!
حكومتنا عالم طيبه
و هيصرفولهم تعويضات
ف ايدينا ايه تاني يا ناس
ممكن عشانكم نعمله
ده قضا ربنا .. مكتوب لهم
و ده عمرهم
و هو العمر في حد يقدر
ثانيه واحده يطوله !
اشحال مكنتوش مؤمنين
و موحدين
متأكدين متدينين
عايشين مع مبارك سنين
بتقابلوا مشاكلكو برضا
و قضا اكيد بيكون اخف من قضا
المولي هو اختار كده
ايه هنعترض؟
ده قدر علينا بينفرض
وياه نعيش
لو في اعتراض
المعترض هنكفره
ع الاخره دوغري نسفره
عالم تخاف و متختشيش
بعدين تعالوا قوام هنا
ناسيين بان انتوا السبب
في حقيقه غايبه عننا
بإن في قطر اتقلبو
ده ملك عام
قولولي بقي تصليحه بس
يساوي كام
علي العموم
خلي الحوار ده عندنا
و لابد يجمعنا الحساب
يلا الحساب يوم الحساب
و ما دام حساب
يلزم له يوم
انسوا اللي مات
ده الحي ابقي من اللي مات
و ان كان لابد الذكري يعني
املوا التويتر تغريدات
اصل انتوا بالوقت هتنسوا
كلها شوية ساعات
يلا افرحوا ده الاهلي فاز
اهي هي ديا الانجازات
هيصوله و زقططوا
م الفرحه لفوا ف الشوارع
و من السعادة اتنططوا
و اياكوا تنسوا بعدها
تدعوا لغزه و اهلها
دول اهلنا
نفس العشيرة
اللي جايين منها
دي قريبه م القلب اوي
هحكيلكو ايه عن قربها
ادعولها ينحاش كربها
و ان تاني قطر هتركبوا
او بس منه تقربوا
نرجو يا ساده تجربوا
تاخدوها عاده
كرروا دعاء الركوب .. ويا الشهاده
ليست هناك تعليقات:
إرسال تعليق