يا مصريين
يا شعب صبور و متحمل
بقاله سنين
ايه يعني جعانين تعبانين
بايعين هدومكم عريانين
بالفقر عايشين معلولين
م الجهل عايشين مجهولين
مش متشافين مش مسموعين
و المسئولين مش مسئولين
متفرعنين
او مفسدين
او حتي فشلة و مُفشلين
عن قصد او مش دريانين؟!
ايه يعني مصر اتأخونت
و في ميليشيات اتكونت
بيضبشوا و بيلطشوا
ف جماعة منكوا اتخونت ؟!
ايه يعني بيموت الجنيه
هيروح و مش مأسوف عليه
اجله انتهي بسوء الختام
نصيبه يعني هنعمل ايه
ايه يعي ضرايبكم تزيد
و الاسعار برضك تزيد
و كل شئ حواليكوا يغلي
و الا المرتب .. ف الحضيض !
بالله عليكم
سيبكوا من كل اللي فات
و المشكلات و الاشكالات
انسوا اللي مات
ويا الحاجات اللي اتنست
و اتقرطسوا
ماهو ياما ناس اتقرطست
صحيح بمناسبة القرطاس
حقيقي يا ناس
رئيسكوا يا شعب بيصلي
و م الحافظين كتاب الله
و ميروحش ف مكان الا
و سجادة الصلاه وياه
ياه ع المرسي مليون ياه
ف جيبه تملي فيه سبحة
وطيب ، خلقته سمحة
راجل اخلاق
و دي حاجه اكيد واضحة
الاسلام علي يدّه
وصل علي مصر
جاي من عهد الصحابة
و بيصلي العشا ف القصر
ف امريكا اشتغل ياما
لكنه بجد مصري اصيل
و عندي دليل
ف لغة الغرب بيتهته
لسانه تقيل
ولاده اخدوا جنسية
و ايه يعني
دي حاجه قديمة منسية !
مصر ف عهده مديونه
و ماله يا خلق فرجه قريب
ماهو المؤمن تملي مصاب
و كله نصيب
و مافيش غير النصيب باقي
شوفوا المرسي و حلاوته
ده مش لابس قميص واقي
هقول ايه عنه يا اخواننا
هقول ايه تاني مش لاقي
معيار الكفاءه مهم
كفاءة مين
فكك م الكفاءة يا عم
ده راجل ملتحي و مسلم
و شكل اللحية ف بلدنا
هتبقي اهم
لو مرسي ميعجبكوش
طز حقيقي مش لازم
نشيله لو ميلزمكوش
و من بعده نجيب حازم !
ليست هناك تعليقات:
إرسال تعليق